校長其實不是校長，正如矇豬不是豬，田雞不是雞一樣。不過校長倒真是人之患。
甚麼？阿 sir 賭馬？
咩呀？阿 sir 唔賭得馬架？邊條例先？
然而，哩個阿 sir 賭馬好風流 ( 啊…係好優悠 )，事前絕不會刨馬 ( 好多年前曾經刨過，而且懶專業，但事實證明辛勤不與回報成正比，時間無咗錢亦無咗，從此不再刨馬 )，也不會進馬場，只在 racing day or night 坐在家裏的梳化上，翹起腳，一邊上網執修那部 cheap cheap卡片機拍下來的爛鬼照片，一邊睇住部電視落注。
阿 sir 賭馬注碼也不大，一個賽馬天投注三兩百 ( 鬼咩，阿 sir 好孤寒，梗係唔捨得辛苦賺黎嘅錢付諸東流 )，落注比雞仔仲要雞仔。
其實阿 sir 無賭馬好耐 ( 因為之前輸到無晒癮 ) ，直至最近舊嘅顯像管電視打柴，死死氣買了部高清電視….死嘞，乜啲馬喺高清電視裏面咁鬼靚 ( 你話影個唔著衫嘅點算 )！嗰啲體型線條啦，肌腱紋理啦，皮膚毛髮啦，神情動態啦，哇，殺死人！自此一有賽事，一干閒雜人等全部番房，電視由我獨霸。
尋日上晝啲細路學琴，阿 sir 慣例自我放逐幾個鐘。到中午，便急急腳趕番屋企，開電腦開電視，沖番杯茶攞舊蕃薯去焗，跟住就望住個電視同啲馬發展吓感情。
哇，2 號靚噃，馬身飽滿，肌肉起腱，神態昂揚，比賽情緒積極。13 號馬頸有力，全身泛起油光，而且輕磅，檔位唔差。2號13號位置連贏有 110 倍，買！結果跑第一第二。嗌完之後望吓賠率，吓？得番 75 倍，明顯有人落飛。都好喇，可以買好多餐餸。
玩到尾二嗰場，大熱門 8 號對板噃，諗住拖兩隻好冷但好靚嘅馬，望吓賠率，4號13號位置連贏有 160 倍 ( 哩次冇人臨尾落飛 )，於是買角。呵呵，好彩買角，大熱門跑第 ...... 7, 而 4號 13 號分別跑二三。兩個仔咁啱出黎放風，知道贏咗，同老豆一齊嗌，鬼殺咁嘈！
全日最冷嘅兩場位置連贏都俾我哩個唔睇往績，唔睇數據，唔睇晨操嘅傻佬中正，都咪話唔虛榮！電視裏面嘅黃嘉豪 (我第一年出黎教書嘅學生 )都好似冇貼中噃。哈哈，有冇呀，嘉豪？
網上照片 http://www.photo100fun.com/.
.
.
