2009年8月28日星期五

男人會痛

.
上週末在家裏弄晚飯,清炒菜芯是指定菜式。跟往常一樣,把菜洗過了,燒紅了鍋,落油。油滾熱後,稍稍把菜搖過,釋去多餘水份,就落鍋。結果,沙的一聲,這男人便付出了慘烈的代價。

可能是油落多了,又或者燒得太滾,菜附著的水仍多,結果油花四濺。這個在家裏愛赤著上身的男人,腹部被滾油濺中,痛得沒叫阿媽(真的沒叫,正在廳裏看影碟的兒子們還因劇情而高聲大笑)。我連忙左手開水喉用手掬水猛敷,右手繼續炒菜。菜炒好上了碟,才拿寶膚靈敷治。

飯後再細看傷勢,痛是不太痛了,但肚皮多了大大小小五十多個紅印,狀似出疹,又似天花,難看極了。也許這男人將來游泳都要穿泳衣啦!

說是男人會痛,因為正常來說,女人下厨不會不穿衣服 (特別玩意除外),甚至會加上圍裙。但我這個非洲土人托世就是不愛穿衣,結果重創。

書此文以警世,男人入厨,定要穿衣(特別玩意又除外),又或者不要炒菜,用水把菜煑熟算了。


後記:原本想貼張受傷的腩之照,但不想你們倒胃,還是不貼了!
.
.
.

37 則留言:

Ebenezer 說...

未有傷及校長的花容月貌,算是不幸中的大幸的了!

Carrie 說...

Oh no. 保重!快D好番!

L L 說...

Ebenezer:

好彩咋,心口都無彈到,唔係分分鐘左青龍右白虎,變咗紋身。




Carrie:

多謝關心,啲印睇黎有排至退,話唔定要做埋彩光去印呀!

小丁 siuding 說...

"受傷的腩 <== 這個詞非常有幽默感 ^_^

雪山飛狐 說...

幸好你有穿裤子.

L L 說...

小丁:

那是很無奈的幽默 :(

我與你都一樣,都極愛自己的身體。

L L 說...

哈哈,Desert, 俾你笑死我喇!

非洲土人都穿褲子嘛,而且啲蚊好咸濕,叮人嘅蚊都係乸嘛!

the8 說...

慈父受傷了...要小心處理傷口呀!

P.S. 以後煮飯要穿服!

自由行 說...

幸好你有穿裤子x 2

佚名 說...

爺爺無事嗎?孫兒來遲了><!
寶膚靈幾好架,還有京萬紅對燙傷也很好
肚皮很薄的,爺爺一定很痛:(

richmapoor ma 說...

我知道很痛, 不應該笑, 但真的很想笑!

保重!

i.c. 說...

陰功囉,好在冇濺到塊面~~
take care ah~

巴黎旅客 Voyageuse de Paris 說...

唉吔,五十多個紅印,可憐的朗兄!要揸多些creme呀。
如果我炒菜,一定會用兩塊毛巾鋪在兩手臂上,因為試過油彈的痛!

巴黎旅客 Voyageuse de Paris 說...

忘了跟你說,
博頭的「相依」美極了。
是那兒拍的?

韻味熊貓 說...

經此一役,了解到廚房不是睡房.睡房過熱,不會傷皮,只會傷身.廚房火熱,傷皮傷肉也!哈哈!

L L 說...

the8:

知道了,見過鬼怕黑,以後我會架喇!




小行:

褲不能不穿呀,第時師傅喺屋企入厨不入厨都 lam 條圍裙喇,唉,都係做女人安全啲。




傻小佚:

爺爺無嘢喇,行得走得跳得,唔除衫都係一個正常嘅爺爺呀!

當時就真係痛。




Richma:

多謝呀,我自己都愛講笑啫,我會小心處理傷口架喇!

L L 說...

Ingrid:

多謝你,真係好彩架,如果唔係就真係要扮中東女人出街喇!




巴黎:

會架喇,希望第日可以唔駛著泳衣游水喇。

博頭張相喺去年暑假在武功山影的,我執過啲色嚟。




佛爺:

唉,你話我喺厨房 happy 過就話抵啫,今次蝕晒!

肥貓 說...

校長既故事教訓我地

1. 洗完菜後盡可能弄乾菜身
2. 炒菜不可落太多油, 油也不可太滾
3. 煮食時不可赤身露體
4. 家庭 "煮" 主婦真係偉大

篤篤篤撐 說...

好彩有著褲, 如果唔係就係男人最痛..

L L 說...

bingo, 貓姐對晒呀!

煮食時赤身露體真係好危險!

Midnight Singer/ 午夜歌手 說...

幸好你有穿裤子x 3 (大笑中)

你沒事嘛? 很久沒有看blog, 因為忙搬屋和開工

寫了新entry, 有空一看~

L L 說...

篤篤:

如果我奉行天體主義就死得喇,油炸小紅X,想唔做和尚都唔得咯!




歌手:

依家等啲印過咯!依家做我個女人就唔好架喇: Eeee, Eeee~~

新開始喇,一陣去看!

阿湯 說...

laulong兄,多謝提醒!

我等愛在家赤膊上陣的男子,弄菜時真的要小心,以免留低疤痕,在沙灘泳池失禮人前 =)

i.c. 說...

果唔係就真係要扮中東女人出街喇!
——————

你確定咁樣唔會靚仔啲?

L L 說...

係呀,湯記,我都唔知幾時可以喺人前除衫,唉,醫生除外。

L L 說...

Ingrid:

靚仔啲?唔會掛!

除非喺古代,話自己扮大俠,依家咁出街,唔係俾人串就俾基佬追,咪搞!

聶秀康 說...

唉!來遲一步.....用'雙飛人'消痛又不會起泡泡....於新傷口不停的塗,就會好轉!
朗兄文武雙全!

L L 說...

3妹妹有心喇!

哩家暫時還可,等啲印慢慢退喇。

其實我煮嘢來來去去嗰幾味,同你地差得遠喇!

梁奕 說...

睇過呢篇男人會痛...午飯經過GOD...睇見一條好"MAN"的圍裙...應該啱男人用...其實類似廚房經歷,我都試過...個次係煎荷包蛋...真係好痛-.-!

Mag Yip 說...

哈!!男人就是這樣啦!!
我老公都成日唔著上衣煮餸,
不過佢就無你咁既經歷,
我都要驚告下佢要帶圍裙先得啦!!

傷口好快無事既..好番之後..
你去曬下太陽,曬黑左就睇唔到啦!!!

L L 說...

Denzel:

有時諗起,男人 lam 圍裙都另有種味道。尋日我又炒菜,真係戰戰兢兢呀!




Mag:

真係要小心啲。尤其要 fing 乾啲水。

我都諗過曬太陽,依家啲傷口開始甩結咗焦嘅皮,等狀況好啲再去曬曬。

佚名 說...

爺爺:
肚皮薄,爺爺郁動時都會覺痛,因為我都試過燙傷><,關節位最痛,因為好難唔郁動到佢

祝爺爺早日康復^^
有返個靚肚皮

L L 說...

小佚:

以前個肚皮都 O.K. 架,依家花咗咯 :(

睇吓埋口情況怎樣罷!

佚名 說...

爺爺記住定時搽藥膏啊!

L L 說...

哦,知道,依家一日兩次!

Vesta 說...

哎呀!原來你受傷了,現在好了一點沒有?take care

L L 說...

Vesta:

現在好多了,謝謝你!

起名之事,我幫你想想 :)