2011年6月2日星期四

當叉燒飽沒有了叉燒

網上照片:迪比廚房


就像男人沒有了那話兒,還算得上是男人嗎?

叉燒飽是我每天上班的必然早餐,若碰巧剛出爐的更是乖乖不得了,熱烘烘,脹滿滿的,香氣誘人,叫我立即啖之而後快。只是近這週來,飽裏的叉燒卻愈來愈少了,試過吃完了整個飽,只有餡汁,卻沒有半塊像樣的肉。啊呀,沒叉燒的叉燒飽,搞甚麼呢?

早幾個月前,原本10元一份的早餐已加到 11 元。數字上加了百分之十,但 11元一份有熱飲有叉燒飽的早餐仍是超值的,但通脹持續升溫,飽店老板可能不想太頻密加價,於是在餡料上做功夫,結果出了這些無料飽!

我情願多付一兩塊錢了,就是要食有餡料的飽。唉,沒叉燒的叉燒飽,搞甚麼呢?
.
.
.

21 則留言:

Ebenezer 說...

金融海瀟補鑊的遺害,已經慢慢地殺到埋身的了:(

匿名 說...

D租金貴到無人有,仲要俾最低工資。
如果政府嚟一招最高加租幅度,你估有無人撐?
茶少

欣宜妹妹 說...

老師, 點解係"飽"唔係"包"?

匿名 說...

校長:

你入錯左齋舖買早餐?

自由

hollycowplanet 說...

當叉燒飽沒有了叉燒,就是情人再沒有情趣一樣。轉食鷄尾飽啦!

你右边1975張相好有共鳴呵!哈哈!温拿時代!

Coffee 說...

側邊張相其中一位是校長本人?睇不出呢!

匿名 說...

>>男人沒有了那話兒,還算得上是男人嗎?

男人,有那話兒,是男人!但假如有不濟的那話兒呢?仍算得上是男人?


長期讀者

laulong 說...

Eben:

係咯,乜都貴晒,我食啲杞子仲貴得驚人!




茶少:

哩個政府神經刀架,好做唔做,唔應該做嘅就死去做,分分鐘架!




欣宜妹妹:

「飽」同「包」都有人用。前者有5千幾萬個搜尋結果,後者有9千萬個,似乎真係後者較適合。




小行:

我去買早餐,個阿姐見我咁齋,咪俾齋飽我咯 :p

laulong 說...

牛牛:

係呀,我地成班中晒温拿毒,遲啲貼張仲似嘅!




Coffee:

右手边戴黑超嗰個呀!




長期讀者:

都算嘅,只不過係個長期不濟嘅男人咯。而且人老到八九十都多數唔得架喇,但都唔能夠唔叫佢做男人嘅。

卡臣 說...

當老婆餅沒有老婆

laulong 說...

呵呵,當盲公餅走失了盲公,杏仁餅原來冇杏仁......

largeheadboy 說...

係咩,有咁嘅事?我依家多數買雞尾包,十蚊搞掂。叉燒包嘅話,成日因為無散紙焗住畀阿姐找返啲大餅~

新鮮人 說...

煲仔飯入便都無仔的!

哈哈哈~~~

eric 說...

不過十一蚊有熱飲有包真喺平。呢度要三鎊,大約三十六元!所以我多數喺屋企食。

若缺齋老人 說...

根本係市場自殺:加價仲可以留住老兄你這消費力高的顧客,要人畀左錢後貨不對版搵邊個咁貴買個叉燒"味"包?

瞎子 說...

經濟無咩增長,人工無咩加,但物價飛升,叉燒包無叉燒,干炒牛河無牛,滯脹也!

好快肚痾。

佛爺 說...

校長:

此乃將貨,就價!遲D,奶茶變奶水!嘻嘻!

naruto 說...

香港仔有間酒樓個午餐package,真頭賣豉油王銀芽炒河,其實即係干炒牛河走牛肉。。。無癮呀

嘿嘿 說...

那是人妖、变性人啊!

哎呀! 你吃到了“人妖叉烧包”喽! 呵呵呵~ 小心啊!

laulong 說...

大頭哥:

咁又唔係次次咁,不過叉燒平均少咗真係事實。




新鮮:

haha, 煲咗個仔就真係大鑊喇!




Eric:

哇,嗰便物價真係嚇人呀!唔知係咪同最低工資都有関係呢?




若老:

haha, 叉燒味包,若情況持續我就投訴架喇,幸好今日唔係咁,希望係啲肉偶然分唔勻喇!

laulong 說...

瞎子兄:

睇黎痾期真係不遠!



佛爺:

噢,我不要奶茶變奶水呀,奶不可以少,茶又不可以少 @@




naruto:

哇,咁係明縮骨噃!干牛河走牛肉,仲係牛河黎嘅?




嘿嘿:

haha, 好一個人妖叉燒包,笑死我。

咁哩家嘢就好似 N 年前去泰國睇人妖騷咁咯,得個睇字,難有興頭,haha …