2012年4月20日星期五

50 文一碟燒鵝飯

網上照片
我都唔去討論大家樂定價咯,冇人揾槍指住逼你食,唔食大家樂可以食麥記,唔食麥記可以食 K記,就算幫趁大家樂都唔一定要食燒鵝飯。只是如此抬價確實令消費者對高價麻木,燒鵝飯都 50 文碟喇,咁餐肉雙蛋飯賣 30皮有乜咁出奇,殊不知你喺屋企自己整兩碟都係十零文成本。係人都識講鋪租貴,入口食材貴,人工貴,今次係三高唔係三低呀哥哥,於是不停加價就振振有詞了。

在物價瘋漲的年代,減少消費就係保障自己荷包嘅最好方法,食根本唔駛太多,五味令人口爽,口爽令人體胖,體胖令人多病。最近已經不斷有研究指出多食令人早衰,控制卡路里可以長壽,咁為乜要食咁多呢?仲有你睇到啲嘢貴到離奇,由買個衣櫃到買件衫到參加個旅行團,擺明係斬你一頸血,節買節用只係唔想自己做老襯,冇理由咁傻俾人撳住搶架!

講你唔信,喺依家乜都貴嘅日子,我過一日銀包裏只會少咗幾廿才。早餐 12 文,報紙 5 文,晏晝去阿媽到食冇得計,下午茶當晚餐16 (有時下午茶都唔食,番去煮個麵 ),食個蕃薯食條蕉補充吓纖維素 5,6 文,一日車費 25 文,食少少零食花幾文,加埋 70 文唔駛。咁食碟大家樂燒鵝飯接近我一日消費咯,仲食?邊有咁笨猩!

咁看官又唔好以為我好苦喎,我自得其樂,心情舒暢,反而如果晚晚要我食得多我肚皮仲感壓力。要我駛錢嗎?得,到經濟低迷時我反而會多買嘢,真係又平又抵,記得沙士後我買了成打質素好唔錯嘅 under, 平到 10 文條。下次換家俬都係等啲嘢平咗至算咯,同物價相追逐,確實係好不智的。
.
.
.
去年今日:左丁山怎樣看教材
.
.
.

22 則留言:

雪山飛狐 說...

同意你的观点,在大足的时候跟岳母坐三轮车,叫价4块钱(08年才1块)。岳母说太贵,司机说都不够吃一小碗面。

去一趟超市三百多,去唱K最小的房间都差不多五百。中国的物价涨得太凶了。

eric 說...

我記得以前喺大家樂食一餐大約二十文㗎咋。

詩白爾 說...

食飯豐儉由人,廿蚊夠可以係彩虹道熟食中心食一個平價自助午餐…有魚有菜有肉有湯有飯有粥,係多師傅同調色啫

IamMiss無糖 說...

最新報價係食鵝髀要70蚊!我一日3餐都係屋企搞掂之下,除非買左日用品,否則一日都係洗$10以內,其實人人都成本高漲瘋狂加價,最好就係幫襯返D小店,一來可以抗衡返連鎖店,又可以幫D小店生存落去。

largeheadboy 說...

咁校長咪收收埋埋好多囉 :p

l.minor 說...

唔食燒味,都重有好多平野食嘅

不過唔好食太多麵,肥呀~

韻味熊貓 說...

校長:

我生活的地方已經走過了香港的道路,這裡的人都帶備午餐的,間中才會出去食午飯。其實經濟發展必然會推高物價,這是無可避免的。

Hana 說...

咁我自己食野都好鬼平,鐘意食的蕃薯南瓜粟米都好平,瓜菜自己種唔使錢添,係為份工要請人食先貴咋!

講返自己煮,除非餐餐即食麵、腸仔蛋,依加一個正常有老有少屋企煮餐三餸一湯並唔平架!特別係煲老火湯的話。

the inner space 說...

有人E貓給我的可供參考:

http://www.sharpdaily.hk/article/news/20120420/81117

大家樂一客燒鵝飯賣50元成為城中熱話,《蘋果》記者昨日到中環分別購買大家樂、鏞記和一樂出品的燒鵝飯,比拼價錢、份量及質量,並請來米芝蓮星級點心名店添好運大廚培哥麥桂培點評,結果大家樂「最好味」,一樂「最抵食」,鏞記則「最失望」。

燒鵝飯昨日成為中環人熱門午餐選擇,名店鏞記更是大排長龍,因為不少人閱報後才知道鏞記外賣一盒燒鵝飯只需38元,紛紛前來搶購,《蘋果》記者輪候20分鐘才購得一盒,再購買大家樂和一樂的燒鵝飯作比拼。結果大家樂的燒鵝份量最多、一樂最少,飯量則以鏞記最多。

添好運主廚:燒得過火
除份量和價錢外,燒鵝味道尤其重要,記者邀請名店添好運大廚培哥試食品評,而培哥事前並不知道各燒鵝飯是來自哪間食肆。培哥試食後認為大家樂那份燒鵝最佳,色澤光鮮,肉質鮮嫩,而且味道最香,「呢份(大家樂)係鵝髀,一般唔夠鵝背同腩咁香,但都有咁濃味,好難得。」至於「最抵食」的一樂燒鵝,培哥盛讚肉質夠嫩滑,只是味道略嫌不夠香,而鏞記的燒鵝,培哥評價最低,他說:「可能因為呢份係鵝背嘅關係,肉質韌同老咗少少,可能燒過咗火。」
被問到一盒燒鵝飯的合理價格,經營食肆的培哥認為不應超過40元。

匿名 說...

校長咪收收埋埋好多囉 x 2

Hana:
認同呀!買餸煲湯一d都唔平,不過可以用咁上下價錢買好d咯!

自由

L L 說...

Desert:

08年才1 塊,實在漲得太厲害。我在武漢街頭小舖吃碗麵也要六七元,國內最低工資平均仟三四,怎樣生活呢?




Eric:

依家最平嘅都要過 30 文,是欺人的物價咯!




小詩:

深水埗也有良心飯店,十幾文可以搞掂一餐,但勁相逐利的店仍是太多!




大頭哥:

我駛得少,但慳埋慳埋就俾兩隻超级化骨龍 fing 晒,又學嘢又補習,又要食得多,真係唔得佢死!




無糖:

小店生存空間愈來愈窄咯,淨舖租都足以扼殺佢地生機。咁我都讚成多光顧小店架!

L L 說...

minor:

我依家煮麵都係盡量食非油炸嘅!其實燒味都唔健康,幾十文碟更加食唔過!




佛爺:

你個边有咁嘅習慣最好,其實世界好多地方都提倡節儉,澳州人鈡意執舊家俬用,日本青年人依家潮流興享受不購物,只係高唱普世價值嘅香港人仲以消費為尚。




花花:

之前有人計過數,三餸一湯起碼要七八十,買湯料就更加貴,真係香港居大不易!




inner:

呵呵名店又係名不副實。話時話我都食過添好運的名牌點心,都冇乜驚喜,睇黎老外的 taste 都係一般。




小行:

收埋收埋好多當票啊 :(

卡臣 說...

窮人無路行

L L 說...

寄望新政府能做啲嘢喇!

雪山飛狐 說...

校长,
这次回去还跟了姨父去看他负责的建筑项目。是为政府(大足县)修一道桥。据他所说,一般工人100块一天。有特长的更多。一个月30天算,都3千了。当然地盘工比较辛苦。

在重庆市区一个餐厅的普通服务员叫价1300,洗碗的都有1500,可能比较辛苦吧.

话说回来,如果在家附近可以当个地盘工人都有3000,谁还愿意离乡别井去广东工厂打工呢?

Armadillo 說...

$50燒鵝飯好難講話係咪貴,如果嗰啲係真嘢,而唔係扮鵝嘅鴨。至於慳住嚟使,我都覺得冇問題,最緊要係自己唔好覺得委屈囉!

匿名 說...

哗! 真係幾贵咁播!我一向唔睇價,但好似最平在多倫多C$3.99一碟,等於$28蚊港紙!

L L 說...

Desert:

當地盤工還要一點專業,像紮鐵、落板,而且工傷機會也大。也因為內地最低工資,所以珠三角也鬧民工荒喇!




Arma:

我就黎練仙喇,個胃好似細咗,唔想擺咁多嘢落去咯 :)




牛牛:

香港仲貴過加拿大,撞鬼咯 >.<

the inner space 說...

記得多倫多GTA是沒有燒鵝賣的只有燒鴨,
故想向Holly姐與佛爺 reconfirm 一吓!

S 說...

我公司樓下就係大家樂,但我除咗勁趕時間或打風落雨之外唔會去,上環仍然有茶餐廳三十零蚊一個餐,我食量唔大,覺得幾好。

L L 說...

inner:

其實鴨同鵝既分別,我都食唔出!




S:

係呀,所以都唔一定要幫趁大家樂。食得少,化學嘢激素都會吸收少啲,身體仲好啲添!

韻味熊貓 說...

the inner space:

加拿大鵝是受到保護的,所以全加拿大也沒有鵝食。

然而,當加拿大鵝的數量太多時,政府就會有「特別准許」,可以捕獵規定數量的鵝,開「慈善餐」,但不許作商業用途,只可以「開餐」來籌款,作公益用途。

所以,華人燒味店,是沒有燒鵝賣的。連香港的零食「齋燒鵝」,在加拿大要改名做「齋燒鴨」,忌諱也!