2013年10月28日星期一

振.英哥沉思錄

.
網上圖片
以下情景純屬虛構,事件卻不:


整 ....... (可自己配上另些助語詞 ),批牌批牌,唔係貪曾條死佬留低啲蘇州屎,都唔駛我去煩哩壇嘢!

唉,依家唔搞唔搞都係要搞。三個申請免費牌,最乾手淨腳就批晒喇,但 o靚仔基條友憑乜啫,冇家冇底,搞寬頻搞到咁,夠晒脾喇,仲想做傳媒大亨?仲有條友口花花,問啲準亞姐個波係咪真,咸咸濕濕咁,第時大把美女藝員圍住佢,佢咪好發?

最唔放心嘅係,條友曾經揾佔中嘅 陳X民做佢舊電訊公司董事,又揾寫文爛過乜,冇料靠舐嘅前新聞專員做電視台軍師,嗰個姓何嘅擦鞋仔係人係鬼都未知,睇黎 o靚仔基真有可能係隱形泛民,搞個台做掩體,做大咗就變身,大鑼大鼓咁叫人去佔中,咁我真係唔得佢死,俾個牌佢真係分分鐘捉蟲!

小小超條友係有米泛民,我知,睇佢份報紙就知喇,根本就係五區公投,反高鐵,反國教,反發展東北,倡議佔中嘅背後炮臺,就算佢依家嘅收費台,成班老中青泛民,好似乜都唔識嘅元老飛,唔男唔女嘅哨牙森,係咁曝光,係咁亂噏,想扑佢牌就係,但佢老豆咁猛又點得罪得呢?

至於有記,話晒都係收費電視鼻祖,有十足經驗,而且個台都算正氣,條水又係來自船王包那邊,唔死嘅話船王直頭係北京最信任尊重嘅人,發牌俾佢冇懸念咯!

真係麻鬼煩,算喇,先批俾兩個大孖沙先,哩啲人得罪唔起,條 o靚仔叫佢放吓草先喇,十億八億佢蝕得起。

話時話,貪曾哩條最大無間道,佈置落黎都唔慌好嘢,今次死錯人嘅機會細於一半,批佢我就死咗大半,咁梗係唔想自己死喇!

哎吔,幾日冇去睇吓後園啲花喇,唔知有冇蟲蛀呢?

咦,冇厠紙嘅,整 ....... 阿 Maria 你搞乜鬼呀 ~~~~
.
.
.




10 則留言:

嚴嶺鋒 說...

整.....你做咗振英哥条 X 蟲?豎起条尾,係大係細都俾你知道哂。

laulong 說...

哈,咁鬼核突 @@

蝸牛 說...

佢咪好發?哈哈!寫到似層層,幾時再整個維基沉思錄?不過羅丹泉下有知睇到幅圖吐血死多次。

匿名 說...

Suffering constipation at both ends!



sPace

佛爺 說...

校長:

北美洲,就算是同女友或老婆做愛,女人突然喊叫:「停」。若果男人「停」唔到,照樣會被控強姦。靚仔基自己開波,人哋都無點頭,佢咁惡做乜?莫非,霸王硬上弓大哂咩?

嚴嶺鋒 說...

對不起,以為你有同好,鍾意廁所文章 :(

laulong 說...

牛兄:

振.英哥沉思的場景係假的,引述的事卻是真的!




inner:

揾一餐,才知 constipation 係便秘 ^^




佛爺:

俾你點中穴喇,稍為理性同穩重之人,都會喺批牌後才開動,即係俾人送個秋波就除衫?係咪太喉急呢?




嚴:

哈哈,冇事冇事!

Quality Alchemist 說...

為香港創意產業悲哀!
正所謂民不與富鬥,富不與官爭。這是因為資源的問題,政府現正準備用公帑來打王維基,也是不公平的。

laulong 說...

官不與富綠燈的原因是甚麼呢?純粹的市場不能負荷?

我都一直困擾這問題!

佛爺 說...

QA:

西方世界,喺人都知要告政府,你一定要有時間同錢,才可以同政府玩,無人話唔公平㗎喎!