2011年5月18日星期三

高官還是一樣的蠢

德育及國民教育科,不用搞了,那是叠床架屋,添煩添亂。只須把中史列為必修科,把刪掉了的中文科範文考試恢復,已達到推行德育及國民教育科的大半果效。

不要忘記新高中通識科還有個「現代中國」範疇。

新高中學制推行迄今,弊處漸呈,都是因為主理官員對教育一無所知,輕信一些漂亮卻不實的口號,像「文中有理,理中有文」,結果弄出個大白象選科架構,讓有些學生文理商兼修,造成學能浪費。「不要一試定生死」又走出了個校本評核怪胎,令老師疲於奔命。

真是江山代有蠢人出,各誤蒼生數十年。我交稅,真係交得好唔冧!
.
.
.
去年今日:無品無格,無敗無敵
.

38 則留言:

新鮮人 說...

高官一向是蠢的,
唔蠢做唔到高官!

匿名 說...

傻朗:傻得很的標題!
高官就只是富貴命一條,中外三千年來幾許出過一个有腦又愛民的"官"呀?

繼續交稅啦!:(

C.M. 說...

>>只須把中史列為必修科,把刪掉了的中文科範文考試恢復,已達到推行德育及國民教育科的大半果效。

x200000

不管內容如何,該新科目會收窄學生視野,而非擴濶,因此我認為絕不可取。

naruto 說...

炒左最高果個啦,見到呢一代教成咁,真係唔炒佢炒邊個

L L 說...

新鮮:

最慘喺佢地無自知之明,個個以為自己係精英,結果誤盡蒼生!




牛牛:

就係香港啲官特別屎咯,港人治港結果攪出個大頭佛!




CM:

仲有庸師呢!唉,見到啲唔睇報紙嘅通識科老師我已經頭暈,唉,一啲敏感課題分分鈡由個性偏執,知識不足的老師教,得個死字。




naruto:

有大食大,要郁嘅梗係郁個大架喇!

瞎子 說...

劉兄:

班官唔蠢㗎。佢地積極不干預啫,等退休。靠呢班人幫我地護井,佢地唔引入河水已經偷笑!

匿名 說...

啲咩通識科, IH, 執晒佢啦.

君不見以前讀史地經濟出身的同學, 根基紮實好多!

依家啲偽通識科, 綜合人云科, 結構鬆散, 浪費寶貴上課時間, 最戇居係浪費大量時間教睇報紙, 又逼學生花錢訂兩三份報紙, 美名謂之"分析", 挑! 睇報紙使鬼教咩! 學啲有用啲嘅嘢好過啦!

匿名 說...

高官,加埋有四個口,佢地話咩,我地D蟻民邊有得反對。
德育教育,即係禮儀廉恥忠孝愛敬勤誠果D,要用行動去身教,唔係用把口教嫁。
國民教育,即係咩呢......
回歸中國後的香港......
越來越......

新鮮人 說...

係呀,
唔記得講:
"蠢"和"無自知"係孖生兄弟,
他們會一起出現的。

largeheadboy 說...

班高官日日坐房完全唔理外面嘅世界!

我交稅,真係交得好唔冧x2

韻味熊貓 說...

校長:

我都覺得中國歷史應該是必修科,就算我對中國歷史朦查查,讀過之後,都略知輪廓呀嘛!

匿名 說...

交稅呢樣野,有能者就要交的,
唔冧都要交嫁。
計你一年交三四萬稅喇,
唔好以為好多,
如果閣下有兩個仔,係香港讀書的話,
每年政府係要津貼位位三萬嫁,
劉兄你兩隻化骨龍計......
計落你交得少啦......

L L 說...

瞎子兄:

最惡頂就係哩個班子仲有年幾任期,依家就開始做看守政府,年幾呀,關係香港 700萬人年幾嘅福祉,就因為等任滿而看守?哇,有冇道德架?




12:12:

報紙要睇,問題係資訊紛陳,缺乏架構。若由庸師去教,也只是教出個混沌來。新高中把修讀科數大幅斬件,令學生缺乏較廣泛的學理基礎,確是好做唔做之舉。




8:13:

中文新課程砍掉範文考試,結果令範文教學徒具虛名,教師無心教,學生無心學,結果水過鴨背,中國優秀文學遺產裏的情意教育不能滲透,學生咪愈來愈不文,愈來愈憤激,愈來愈脆弱,愈來愈卸責咯!




新鮮:

嗯嗯,對,對。再加上哩班高官被人擦慣鞋,於是個個以為自己係神係全能。

L L 說...

大頭哥:

係呀,坐喺冷氣間,出入公家車,個社區點,個環境點,個民生點乜鬼都唔知,制定政策咪錯漏百出咯!




佛爺:

讀歷史可以學好多嘢,唔單止認識自己國家同民族嘅過去,仲可以增長智慧。不過乜嘢人教好緊要,俾啲庸師教,淨叫你記乜記乜,唔係培養解讀歷史嘅思考,就真係冇鬼用咯!




12:45:

咁我又冇話唔交,乜你跳得咁快呀!至於我交幾多稅又點會俾你知道吖,不過跟你邏輯,如果有四條化骨龍喺香港學校系统讀書,咁就算交十皮稅都係少架喇,嗰啲唔駛交稅嘅更倒賺十幾皮,所以教育搞到幾屎,交稅唔交稅都唔好有唔冧的感覺呀,除非你交過廿皮以上喇!

呵呵,原來不滿只係高收入者嘅專利,咁啲 80後抗議乜鬼嘢啫,你地享受道路建設、自來水、垃圾處理、警力、消防、白車、入廠乜都賺晒喇,所以冇得不滿!

哇,你真係幾銅臭兼法西施噃!

匿名 說...

老師曾經講:
歷史給人類嘅教訓係---人類往往是不會及不懂去吸取歷史嘅教訓。
佢呢句又精又金嘅總結,我聽完後,
很有同感,所以,中四退修中史。
由細到大,中史,在本人眼中,
是一個興趣選修科,鍾情人大有人在(如劉兄)。
不鍾情者,亦大有人在(如某官)。
中史列入必修科,咪玩啦。

L L 說...

吓?你老師哩個叫金句 @@

國史必修,世界上有國家是如此的。

嘿嘿 說...

来个类似胡姬花的紫金花变数?哈哈哈~

韻味熊貓 說...

校長:

「哇,你真係幾銅臭兼法西施噃!」

法西斯!我想了一會才想到你是比喻什麼?嘻嘻!

匿名 說...

成報20/5/2011
洗腦講法是侮辱師生

  【記者陳錦輝報道】政府建議全面推行德育及國民教育科,令教育界擔心學生會被洗腦,特首曾蔭權回應議員提問時稱,香港屬於國家的一部分,提高學生國民認知是應有之義,認為議員引述國民教育是「洗腦」的講法,對老師及學生是侮辱。

提高國民認知應有之義

  教育界議員張文光昨天表示,中聯辦宣傳文體部部長郝鐵川稱國民教育是必要的洗腦,若不聽命於中央政府,不可稱為國民教育,令本港教育界留下深刻的印象,質問政府是否同意有關的觀點。

  曾蔭權拒絕評論上述觀點,但稱香港作為中國的一部分,協助學生認識中國人身份及視國發展,是應有之義,而且不少先進國家亦有這種做法,現時只是強化現有的德育及國民教育科,「國民教育唔應該用洗腦,我覺得對老師或學生有侮辱。」對於學校可否同時提供六四事件,及內地維權藝術家艾未未被拘禁事件作教材,曾蔭權重申,學校毋須迴避任何事情,社會可就國民教育科的課程作公開討論。

個人認為曾特首言之有理。

Ebenezer 說...

誤人子弟,又一例証:(

匿名 說...

香港回歸中國,
話咁快就14年。
教育,的確好重要。
新一代,是未來的棟樑,
佢地要先認同國民身份,
才可為中國為香港作貢獻。
從經濟角度看,歐美日英意法俄都人人自危,
中國要後來居上,必須要從人民入手,
我好期待,幾時普通話同人民幣可以成為國際語言同貨幣。
中國,的確有好多未如人意的地方。
難道,身為中國人的一份子,
有人將中國日踩夜踩,難道中國就會因此而日益繁榮嗎?
要一個國家富強,國家的人民嘅熱情投入同貢獻係好重要。
劉兄,你熱愛中國歷史,
敢請問閣下,愛中國嗎?
願聞其詳。
你對國民身份教育,有何巨體而行之有效的方法或意見呢?(除了將之列為必修科外。)
願聞其詳。

fly 說...

現在很多人不明事理, 顛果為因, 都是廢棄歷史之過.

L L 說...

嘿嘿:

貴國也有推國民教育嗎?胡姬花,比蘭花好聽多了!




佛爺:

法西施,haha, 「東施效顰,益增醜態」,我是無緣無故走出這語的,是潛意識的批評對方?真有點汗顏!





10:41:

我認同需要提高學生國民認知,但不建議另設一科,反而在現行科目架構與內容作調適可已!

至於洗腦說,那是違家背族者之誣陷,是爛言,他們只是自暴其醜。




Eben:

就是。那位老師的觀念、邏輯全錯,怪不得走出如斯不明事理的學生,叫人扼腕!

L L 說...

3:08:

愛,很愛。正如你所講,中國有很多需要改善的地方,我們要給她時間,體諒和包容。但也要指出她的不足,好讓國家可以正視和修正。

除了中史必修,也要重訂中文科教學,恢復範文考試,讓學生重視範文,深入研讀,自然受到優秀文學遺產情意薰陶。

隨著國力提升,國內更應做好道德教育工作,到國內負面新聞減少,香港人就會以國家成就為榮,要弄好國民教育就易得多了。

而作為教育工作者,我有做我應做的,敞校圖書館以前沒有訂文滙報,我引入,甚至要中四五通識科訂閱文滙大公,以增進學生對國家認識,呵呵,原來我已在做國民教育的工作。




fly:

謝謝留言。

歷史是經驗與智慧的累積,但因為一些庸師死板教學而令人卻步,是很令人惋惜的。

匿名 說...

我是4:58匿名,即中四退修中史那位。
當年那位老師對中史的評價,於本人心中,
直至現時都是一個既精且金的句子。
歷史對人類的教訓,本人是經過思考及觀察後,同意該句的總結。
那是一句事實的陳述及或一句主觀的感受也好,本人到現時仍十分認同。
本人對劉先生的批判,卻不感苟同。
由始至終,劉先生對國文國史的鍾愛,
本人都很尊重,然則劉先生卻對不喜歡國文國史的本人,有意無意的斥之貶之。
那老師是不是誤人子弟,你及eben又怎能單憑一件事就咁快立論呢?
那位學生不明事理嗎?
一個學生不喜歡你喜歡的國文國史就叫不明事理嗎?
幸而我不是你的學生。
你校有多少學生喜歡讀國文國史呢?
劉先生既然認為國文國史要成為必修科,
請向你校長提出,本人倒想看看你的校長如何回覆。

L L 說...

好,有空跟你上一課。

不過也要你先做功課,我說你老師那句:

「歷史給人類嘅教訓係---人類往往是不會及不懂去吸取歷史嘅教訓」

觀念、邏輯全錯。你再想想你老師的觀念,邏輯有可能錯在那裏?

匿名 說...

劉先生:
你說該位老師的說話,觀念、邏輯全錯。
你可知道,你的觀念、邏輯,我卻不感苟同,
可我不會斷言你的觀念、邏輯全錯。
只會用受與不受來歸納之。

該位老師的一個總結,在我個人來說,是一個個人評價,多於是一個邏輯。
個人評價,是有主觀成份的,無對與錯,
只有接受與不接受。本人是接受,劉先生不接受,你我縱然不同感受,互相交換感受,希望劉先生不要怪我無禮(什或無腦無知吧)。見笑見笑。

你知道我為什麼不讀歷史呢?
1. 歷史,HIS STORY,好多人都以看故仔的心情去讀,由於是故仔,你有興趣你就讀啦。無,而又可以選擇唔讀,咪唔讀囉。
2. 史實,有多少是真。記載了,又多少是事實的全部。如果唔係事實,又唔係全部,又要我當事實同當係全部去研究,好自欺欺人及不盡不實喎。
3. 讀歷史可以訓練分析力。要訓練分析力,有好多方法,唔一定只有讀歷史啫。

劉先生說該老師對歷史的主觀評價有錯,是劉先的個人認為,你先後提出了兩次。本人亦要再三向劉先生表達多一次吧,本人不像劉先生,用邏輯法去推敲別人的主觀評價,我會用受與不受去做結論。
事實係,我對該老師的那句說話是受與認同,而劉先生是不受及稱之觀念、邏輯全錯。

同一句說話,有兩個不同人的不同評價。

同樣,面對歷史,劉先生珍而重之,
我,卻,敬而遠之。

敢請問,不讀歷史的人,在劉先生眼中可會是一無是處,一文不值,低能白癡的人呢?有何佐證?讀了歷史的人,又可會是文高百斗,高高在上,分析力強,行文流暢,甚或觀念、邏輯全無錯呢?

候教候教。

eric 說...

前一陣好忙,都冇乜留意香港新聞--教育署又有新花款?我有興趣想知德育可以點樣喺高中教??
中文唔考範文可以考啲乜??

L L 說...

11:49:

很好,你能溫文的回應,值得尊重,但回你不是三言兩語,待有空時復你。




Eric:

作文,應用文,理解照舊考,但加了聆聽和說話考試,走嘅係考英文嘅路線。

愈來愈覺得,把中史、文學邊緣化、範文不考,是正如文友瞎子兄所言,是要從文化聯繫上,把香港從中國割離!

eric 說...

將中文當一門外語來考核,似乎是壓低了母語的地位。說話考試?是辯論還是朗誦什麼的?
我的中/西史很不濟,到現在有點後悔沒有好好讀。

「歷史給人類嘅教訓係---人類往往是不會及不懂去吸取歷史嘅教訓」

如果沒有讀歷史,「人類往往是不會及不懂去吸取歷史嘅教訓」就不成立。正是因為熟讀歷史,才會有這感嘆。但不可以成為不讀歷史的理由。

L L 說...

Eric:

漏了講德育。其實一般學校都有教德育,但不是學科課堂形式,而是通過週會或聯課活動進行,輔導組,團契,社工其實都做了部分工作,這類活動也多在低年級進行,高年班已走入了考試導向。

中文科說話考試包括個人朗讀與小組討論,其實好鬼攞黎搞!

「歷史給人類嘅教訓係---人類往往是不會及不懂去吸取歷史嘅教訓」

謝謝你為我做了詮釋。我明天空閒點再給匿名君補上幾句 :)

Midnight Singer/ 午夜歌手 說...

依家D課程,教嗰個頭赤,讀嗰個仲頭赤...

肥貓 說...

高官蠢都已是路人皆知的事實,最慘係佢地不知人間疾苦!!

L L 說...

歌手:

真係改到人唔似人,鬼唔似鬼,啲o靚仔,個社會俾佢地累死。




貓姐:

就是。這班人從來遠離群眾,不識歷史,無視現實,毫不專業,真係誤盡蒼生。

匿名 說...

呵呵!好熱鬧呵!

Midnight Singer/ 午夜歌手 說...

呢個新高中課程有排磨合...
但睇落, 舊高中仲好!

S 說...

>>真是江山代有蠢人出,各誤蒼生數十年。我交稅,真係交得好唔冧!

我同你一樣!

L L 說...

牛牛:

前人文句:我愛熱鬧,也愛清靜 :p




歌手:

我也有相同感覺。




S:

就是為甚麼我們要被這些庸官拖累呢?唉!