2011年10月9日星期日

旅途鬼揞眼

再講多些可能你們會一哄而散了。其實在旅途上的12個獨睡的晚上,都沒有靈異事件發生,真係鬼影都無一隻,我晚晚都睡得安穩(在火車上的幾晚就不成了,就算有卧鋪的,都難以入睡)。

只是在海拉爾回程的那晚通宵硬坐後,早上在哈爾濱找了間舊樓上的小旅館睡幾個鐘。進房後,拿腰包裏的拖箱鎖匙時卻發現不見了。想來該是在海拉爾火車站外取旅遊書後掉了。然而我早有準備,放了後備匙在肩袋裏,這十多天來第一個錯誤我還是可以處理的。我滿是信心的去找後備匙,但奇怪,把袋子裏的東西翻到一床都是還是找不到。

沒辦法了,唯有找旅社的老闆幫忙,請他幫我把鎖剪斷。這高大的東北漢子看了看,回頭拿了鉗子和螺絲批,不用 10 秒就把鎖頭撬開了。我道謝過後,把東西拿出來預備梳洗,再回望床上,竟然在當眼處就見到那條後備匙!

嘿,真的鬼揞眼,就是要我的旅途 0 錯誤目標落空。走筆到這裏,忽然想起上次險些遺失太陽鏡也就在這裏,那天巴士就停在旅館下面的這條街上。嗯嗯,出黎行,遲早要還,信焉?


哈爾濱市的老建築,背後就是高樓大厦,呵呵,我想起了周星馳〈如來神掌〉的場景。


中央大街上的俄式建築


沿著中央大街一直走到防洪紀念塔廣場


廣場上有澆花的專車,我想起北京晚上有專車為道旁的樹木噴殺虫水,香港該沒有罷,所以香港冧樹特別多。

防洪紀念塔


松花江畔有人游泳,有人在閒坐,有玩泡泡的少女,很熱鬧的!


廣場另一邊也有街頭畫家,自畫像很似啊!


逛過防洪紀念塔廣場及中央大街後,坐公交回旅館取回行李,預備連續兩晚的通宵硬坐。那即是說,是一連三晚通宵,對我這個老人家來說,可真是一個太大的考驗!
.
.
.

17 則留言:

Coffee 說...

請問「巴士停在旅館下面的這條街上」,同「出黎行,遲早要還」有甚麼我未看出的關係呢?

BTW,校長你當場意識到時,驚唔驚?有冇嚇出一身冷汗呀?

佛爺 說...

校長:

第一間屋似民初的環境,其餘的猶如歐洲,連氣氛也像西方。

laulong 說...

Coffee:

我係咁諗咯,這城市,或者哩條街係都要我損失一些東西,上次太陽鏡失而復得,今次鬼揞眼係都要我犯吓錯!

當時冇聯想起太陽鏡嘅事,沖完涼就撻上床瞓了,瞓咗三個幾鐘就去逛中央大街,‧晚上又要搭通宵車,呵呵,仲要兩晚!




佛爺:

中央大街是哈爾濱精粹,俄式建築活化得幾好架!

laulong 說...

咦,Coffee, 我突然間諗,會唔會係我根本冇喺海拉爾唔見鎖匙呢?

呵呵呵,咁哩個鬼揞眼就有啲瞄頭了 ^^

Coffee 說...

嗱,校長,我唔係嚇你呀,係邊度唔見都好啦,千祈唔好突然又見返條鎖匙咯:P

(唔好鬧我喎)

laulong 說...

呵呵,見番喇...

spare 嗰條嘛,kakaka...

但話唔定 spare 嗰條就係原來嗰條,哇~~~

SKII 說...

最後那一幅,“自晝像”是指圖中右邊那幅“相”嗎?看不出是畫的!

eric 說...

我每次去旅行都會有啲阻滯,最嚴重嘅喺去到機場才發覺帶錯護照,差啲冇得去。

laulong 說...

S:

是畫的,那就是高超之處啊!




Eric:

最終去得成就 OK 喇!我就是要考驗自己,但就是可能太攰了,最終還是有了點錯誤。

新鮮人 說...

有時就是這樣,
愈找愈唔見,
唔理佢,
一陣就自自然然出返黎,
好神奇!

匿名 說...

在酒店一個人獨睡,對我黎講太大考驗呀!

自由

火女 說...

鎖匙之靈異事件?

哈哈哈!

laulong 說...

新鮮:

可能真係有頑皮嘢在搞搞震 :p




小行:

心無罣礙就得架喇,我有時甚至熄晒燈,係全黑咁瞓!睇唔到,睇唔到,乜都睇唔到!




女女:

係呀,依家寫番才覺得有啲怪!

匿名 說...

又怕鬼又怕賊...試過一次一人行連續8晚都訓唔好,我就知道我原來咁弱雞!睇怕我唔會有下次。

自由

laulong 說...

咁你女仔人家,一個人驚係好正常嘅!師傅最初一支公住一間房都有啲怯架,但慣咗就冇嘢喇!

Armadillo 說...

哈哈,咁最後喺嗰間靈異旅館瞓咗幾粒鐘,又有冇發生乜嘢另類豔遇呢?

laulong 說...

呵呵,剩係去沖涼時見到鄰房嘅美少女出黎刷牙洗面咋,跟住乜都無,撻上床就半昏迷喇!

哇,返工喇, go go go !