2013年11月21日星期四

鬧電視發牌黑箱操作只係法國大餐

.
網上圖片
林換缸條戲子佬話開電視台唔同開茶餐廳,此言甚對,我仲喺學生面前讚過佢,點知幾日後條友公開插老細,根本唔知行政會議常規同核心價值,如此行會首席,真係叫人睇到傻了眼!


其實發牌事件,政棍搞事,係故意忽略行會,甚至政府部門運作的一個守則;公眾不明就裏,自然盲從,行會又礙於運作常規 ( 注 ) 及實際需要不能解畫,於是就被人譏諷黑箱操作。

開電視台真係不同開茶餐廳,免費電視的滲透率高,係娛樂、資訊、政治同意識形態的載體,容易達致社會公利,也容易導致社會公害,所以審批要絕對謹慎。政府用人,一個中上級別的官員,都要經過政治、品格,經濟情況審查,更何況一個茲事體大的免費電視牌照持牌人?

所以魔童之死,實力不足、野心太大都不是主因,而係行政會議喺道德上唔能夠披露的其他原因。正如劉夢熊在選戰裏扑心扑命,都沒有被 CY 邀請入閣,因為佢已經有案在身,但 CY 總唔能夠公開話劉夢熊你個底唔乾淨我用唔到你。CY 早期俾人話忘恩負義,後來劉的官司事發公眾才知乜嘢事!

今次魔童衰咗,行會咪只能披露那些不涉政治、品格嘅弱項,其他係講唔到出口嘅,唔通公布話哩個申請人政治傾向同品格有問題嗎?

所以批評政府喺電視發牌黑箱操作,只係政棍的策略,也是法國大餐,甚至係陰間法國大餐:多鬼餘!
.
.
.
 注:行政會議是特區政府的最高決策機關,由港英時期行政局延續而來,架構,功能,角色基本無異。港英時期行政局阿頭 (即港督)有決策的最終權力,行政局議員只是港督的智囊,在討論政策時給港督提供意見,是否採納都仍在港督的決定,中間不存在少數服從多數的投票生態,是以行政局必須奉行保密及集體負責制,沒有議員可以公開行政局的決策過程和個別議員的取態。



舊文裏答博友問之部分摘錄:

-- CY 團隊唔掂啫,都唔會蠢到以身犯險,韓愈《張中丞傳後敘》有云:「其身之可愛,盜賊之不足以死也」,梁班子民望低迷,實在犯不著冒天下之不韙,批個牌皆大歡喜,話之邊個第日頂唔住死人冧樓,逆民意而行,看來事必有因,而且係不能宣之以口的,於是只能以保密制去頂住


-- 有冇睇《振 . 英哥沉思錄》?王維基的其中一位可能的損友,就係佔中搞手陳健民,你怎能不叫中環及北京顧慮。


-- 王維基負面新聞不絕,起碼問準亞姐個波係咪真確有其事,帶五個美女入亞視話有乜嘢同佢地講即係同我講,看來都可信,加上最近東周刋的報道,此人品格真有疑點,依家同佔中啲友搞埋一堆,同泛民這段三角関係已經可以將佢葬送
.
.
.
延伸閱讀:王維基愈來愈死得明白

                諍言不是這樣

                :林煥光小人格局

                :振 . 英哥沉思錄
.
.
.

12 則留言:

蝸牛 說...

開口埋口公義嘅人,通常都係"Too simple, sometimes naive"
作為觀眾,睇唔睇都好,多個電視台無壞。不過呢句都係廢話,因為正如多一間士多無壞,多一間銀行無壞,多一間餐廳無壞。無壞啫,少一間會世界末日?
發牌都講公義?發電訊牌、酒牌、的士牌有冇公義呢?投地、工程投標、申請公屋、學校派位有冇公義?老作新聞、老吹業績、抄襲論文有冇公義?一個人有四個老婆有冇公義?

laulong 說...

公義上身,個個就振振有詞去搗亂別人,自己就永遠冇錯,我只能說這些香港人太無知同病態!

香港電視網絡未獲發牌先製作,本身就是個反智行為,你去拍劇咯冇人阻止你,但不能夠說你請了成棚人做嘢,完成了幾套劇我就要批,唔批就唔公義。

公義建基於多個台無壞,建基於啲人有嘢做,建基於冇公佈會議內容,真係太 naive!

新鮮人 說...

話雖如此,
不過政府今次發牌個所謂"基準"真係好令人非常懷疑,
且事後處理手法極差,
如果繼續抱住英國佬遺棄下來的什麼保密基制,
今時今日,
政府做的每一個決定都應該能令大部份市民心服,
此所謂公義,
是一個有效政府所必需據備的,
如果凡事強行一意孤行,
恐怕未必能令市民心服口服,
結果只會令事情愈弄愈糟。

laulong 說...

先講了,垃圾匿名英文留言我不登,因為全是無 point 的廢話!

laulong 說...

新鮮:

都係九十年代之前的香港好,市民冇所謂對政府決策心服不心服,但經濟繁榮,社會和諧,大部分人安居樂業!

匿名 說...

王維基不獲發牌,梁振英未妥善處理,那麼一眾盲從就認定TVB是應該被打跨,這就是公義嗎?

現在太多盲從跟大隊去鬥爭,去打壓某人某媒體,就力直氣壯的說行公義,其實,那班人就正正在打擊公義。哀哉!

Armadillo 說...

思歪踢魔童出局,背後係咪有政治考慮,我就唔估嘞。不過有樣嘢好肯定,思歪真係低估咗公眾嘅反應。鬼咩,條友又唔睇電視、又唔留意娛樂新聞,根本就唔知香港電視有幾深入民心!呢個政治炸彈嘅威力,相信係佢始料不及囉!

laulong 說...

匿名:

打 TVB 的背後,有說是爛果要搞活佢嘅動新聞,希望其網絡電視可以佔到啲 market share, 從而去影響民心。講落都係想搞亂香港,再影響中國,為佢背後嘅金主服務!

假公義之名去行惡,等同打家劫舍,話就話劫富濟貧,其實中飽私囊,這班都是爛人!




Arma:

香港施政者就喺有咁嘅毛病,同群眾及現實生活脫節,即使來自草根,高官咗咁多年,都唔知世界發生乜嘢事, CY 都係咁!

而且哩個炸彈前朝放落,香港搞成咁,貪曾大有責任!

佛爺 說...

校長:

如果王維基攞到免費電視牌,仲會唔會有人質疑行會保密制呢?兼而要伸張公義呢?

laulong 說...

佢地又摷第二個議題咯,總之佢地永遠係公義嘅,人地就唔係,其實哩班人又蠢又萌塞又懶醒,叫佢講道理半個字都 bit 唔到出黎!

奕山 說...

劉兄,
一班政棍最鍾意"佔領"道德高地...
但其實"佔領"呢個行為本身是否道德也值得反思...
可能當"講道理半個字都bit唔到出黎"的時候, 就唯有佔領道德高地吧x.x!

laulong 說...

佔領,非他們本有也,是強佔,用粗暴,用橫蠻。

你道出了機關要害處 :)