2013年1月10日星期四

在痛楚來臨前,人仍是很寸的

.
網上圖片:哩對係男腳掛
教師的職業病:站得太久腳唔掂,講得太多聲唔掂,食得白粉多肺唔掂,其實第三種攞黎講啫,邊有,但第一二種則常見。

教書教到剩幾年退休了,我冇理由唔中彩架,中乜?就係自己最懶醒最有信心嗰樣:腳!

少時日行千里 (梗係假喇 ) ,以步快有力著名,打籃球跳得高,隨時搶贏高我半個頭嘅,上峨嵋行九十九道拐,落華山同啲挑夫鬥快,去旅行孭幾十磅背囊行幾條長街,平時行街一分鐘近 120步,真係身隨意動,如魚入水。

去教書咯,兩堂連企 80分鐘濕濕碎,上六堂嗎?就 240分鐘,完全冇問題。近幾年仲抵死,鍾意企喺度睇六七份報紙,來個鳥瞰式,一眼昅到邊啲新聞重要邊啲新聞有趣,就留下來做教材。

好喇,幾十年下來,企咗無數過月無數個日,唔出事有鬼!

乜事?咁又唔係咩靜脈曲張,而係肌腱勞損,關節過度受壓。尤其早排打雀王會館,唔夠瞓身體容易有炎症,終於出現右大腿肌腱發炎疼痛,捱唔到久站。真攞命,腿如樹之根啊,有事,第日去旅行都麻鬼煩喇,所以宜家死死氣,乖乖地就範,喺課室教書時會挨住遮架,學生做堂課就間中坐十分鐘八分鐘  (但睇報紙仲係愛企 ),有得歇就歇!無偈喇,都喺嗰句:最鋒利嘅刀都有生銹嘅一日!

所以各位都要 keng 錫吓,唔好恃後生,尤其仲有吸煙習慣嘅朋友要戒咯,因為身體嘅變壞勞損唔妥唔會即時出現,而係會無聲累積,表面上冇嘢,但實際上壞緊,到出事時,要番轉頭都唔得。就睇我喇,以前懶醒,依家就多咗毛病!

在痛楚來臨前,個個都喺寸嘅,常以為自己咁強,唔會有事,況且睇落去身體冇嘢吖,食得瞓得,但嘢其實已經無聲無息咁累積。

珍重,我的朋友,如果我以前唔係咁自恃,話唔定我今日仲可以九十九道拐上金頂,落華山鏈贏晒啲挑夫!
.
.
.

47 則留言:

匿名 說...

女人嚟架!

匿名 說...

Take care.

Also don't get too angered for "incorrect viewpoint" by small potato like me.

naruto 說...

好明白,今次病極唔斷尾,真係要更keng 錫自己

匿名 說...

我到今日仍然記得梁享對粗壯無比既腳瓜

Jessica Chan 說...

點止呀,改簿改得多膊頭都唔掂。校長要唔要值日呀,如果要嘅話,仲死多兩錢。

Hana 說...

呢對好明顯係鬼婆的腳囉!雙腿的錢線條似亞洲男人,但對腳一睇就係女人腳囉!

世純 說...

要注意雙腳嘅健康呀,腳痛真係好慘,行去邊都冇心機。 :(

匿名 說...

痛都要行,至多做多D拉筋, 好有幫助, 你都唔想第日坐輪椅架.

卡臣 說...

最鋒利嘅刀都有生銹嘅一日!<---呢句永恆真理

laulong 說...

6:03匿名:

我都懐疑過,肌膚看起來太滑溜!




6:29匿名:

那些留言?沒惱怒,只是覺得不合理不合時宜。




naruto:

要喇,我見好過不少這樣的長輩,不太老,但生命不合理的損折!




8:13匿名:

記得就好喇,壯男子一名喎!

laulong 說...

J:

唔駛值日,但間中都要巡樓,又係行路!




花花:

但佢對手似男人多啲,所以我當佢男人咯!




世純:

係呀,我阿媽就係雙腳行唔到,做唔到家務,好唔開心!

laulong 說...

11:32匿名:

huh?坐輪椅,唔好嚇我啲呀 >.<




卡卡:

就係咯,惟有磨磨磨!

largeheadboy 說...

我都企得唔耐呀
早排去監考無得點坐企/行足全場
攰到哩~

l.minor 說...

保重呢~

雖然你係咁勁,不過都要俾番身體有休息先可以再勁落去

匿名 說...

OK, 對手的確唔係女仔手, 青筋現哂, 可能上咗年紀. 對腳, 膝蓋以下比較幼細, 以上就好粗, 搞到冇咗線條美.

唔明點解會用佢做平面廣告.

佛爺 說...

校長:

唔係喎!唔嫖唔知身體好,唔賭唔知時運高.嘻嘻!

有Photoshop,果兩隻腳,係花木蘭,焉能辨我是雄雌.

匿名 說...

哎 我還可以承受幾多打撀呢

laulong 說...

大頭:

你都係我哩行?




minor:

大家都要珍重,過度運動的創傷同後遺症唔係講笑!




9:41匿名:

我就覺得有啲妖魅,可能廣告製作者以為中性啲,男女都可以投射,但明顯失效。




佛爺:

哇,你咁講,明光社又黎暴你喇 XDDD




2:30匿名:

甚麼?

新鮮人 說...

中到中年就要注意保養,
咁樣先至行得遠,
但再勁都好,
唔好去行九華之類,
無必要請強,
留番俾十八廿二的去行,
否則無事都行到出事,
什麼年紀做什麼事。

匿名 說...

坐得多嘅有 sciatica
用眼過度會 glaucoma

匿名 說...

我係坐得多, 隨時坐骨神經痛!!不過, 一樣都唔企得耐, 唔止關節痛, 小腿整條骨都痛, 腰又係, 洗頭烏低身都痛. 唔中用囉!

匿名 說...

保重呀校長

自由

佛爺 說...

校長:

我比個天佢地做膽,明光社都唔敢碰我呢條淫棍呀!嘻嘻!

我的淫言穢語,乜野道德高台都被我推倒呀!嘻嘻!

睇住呢呀!下星期我又有出世淫作,明光社有本事就暴我篇出軌淫故喇!

laulong 說...

新鮮:

什麼年紀做什麼事,對,要養生了,為了要走更遠的路!




5:07匿名:

坐骨神經痛,青光眼,OMG, 老人家嘅損友呀,唔好埋黎呀 >.<




5:31匿名:

哇,你食啲補骨嘅嘢喇,補骨素,骨痛靈,健胳寶等等,該有啲用!




小行:

痛咗兩日,尋日好啲喇,好似翻番黎 :)




佛爺:

好!要靠你收死班友 XDDD

五珍 說...

健步如飛的校長也遇上敵人了,保重﹗
呢個標題寫得認真好。
留力,讓路走長一點。

laulong 說...

珍:

我係人辦,看我就可以避免老退後辛苦,大家都要珍惜自己!

匿名 說...

校長太遲了我諗睇呢個卜既觀眾個個都同你差唔多呀除咗我

匿名 說...

最近怕凍咗可能同少咗做運動有關
隨着年紀大就愈少運動到最就會更怕凍到時就真係老喇

laulong 說...

11:09匿名:

不,我的博友都很年輕,十多歲二三十歲都有的,而且珍重健康,從來未晚!




1:32匿名:

最近我有用熱水浸腳,效用很好,較不畏冷,甚至連角質皮都去埋,可以參考。

運動少,平時多步行急行,都有幫助!

Armadillo 說...

年紀大機器壞,呢個係必然定律,唔擔心得咁多架喇!我十幾年前去尼泊爾行山已經出現關節勞損,舊年唔信邪再去行過,結果行咗半日就出事。冇嘢嘅,咪以後唔行山囉!

匿名 說...

我出門次次都好mung返到公司都身水身汗但係加加埋埋都只走得15分鐘未到20分既最低標準

laulong 說...

Arma:

不約而同,依家我對行山都少咗熱衷,想去草原湖泊多啲。




匿名:

早 10 分鐘起身,早落車一個站,或者放工行逺一個站才乘車,那就達標喇!

匿名 說...

對唔住我對睡魔亮無招架能力我特別佩服有決心有毅力之人就好似梁享一樣永不言倦!

laulong 說...

咁就好喇,有人你學!

匿名 說...

可以話俾我知佢係男人定女人?

laulong 說...

張相?男人掛!

匿名 說...

咁 我之師呢 呢 好努力好毅力果個呢

laulong 說...

哎吔,我點知啫 >.<

匿名 說...

我去問甘神父

匿名 說...

你為什麼會對甘活望神父這麼忌諱呢

laulong 說...

我都唔識佢,同佢又唔熟,又冇乜兩句!

匿名 說...

"同佢又唔熟,又冇乜兩句!" 唔熟, 即係識啦, 冇乜兩句, 即係有1句起碼啦!

laulong 說...

問路咯:教堂點去?

一句咋,你問完人路都唔會叫人請你食飯教你嘢喇!

匿名 說...

我同佢熟D, 我打算同佢"柄"燭談心添.

laulong 說...

秉燭!

好,今次教你免費,下次收錢!

匿名 說...

公司冇速成啫嘛! 梁老師.

laulong 說...

俾你激死,我姓劉 >.<