好笑嘅男人葬花

話說哎吔校長貼了篇「日月潭那夜」，以為有嘢嘅8妹子即刻飊入黎，誰不知見到兩張單人床，知道冇嘢睇，噓一聲而散；但繼後入黎嘅大頭仔卻眼利，見到床上有花瓣，好奇地問點樣搞啲花瓣呢？哎吔校長懶文藝答咗，咖啡女皇路過，隨即插上一句。校長見招拆招，點知俾8妹子聽到，校長語音未落一個回馬槍從低角度直刺而上，哇，校長一個閃身，一個錯步，避過要害受創後，隨即氣走大小二週天，衣衫迸裂，摩雲手隨著回擊...


大頭仔說：
好溫暖的感覺！
床上啲花瓣咪要瞓之前攞開佢囉~


校長說：
大頭仔，咁酒店同間房嘅感覺真係暖嘅！
那些玫瑰花瓣 (哇你好眼利) 我咪攞去枱面放咯，爭啲攞去葬花添呀！


咖啡女皇說：
>>爭啲攞去葬花添呀！
笑死人咩！校長大人扛住把小鋤，挽住袋花，邊行邊吟林妹妹，扭下扭下...(小心喎)！


校長說：
haha, 乜你講到咁鬼乸架！男人葬花，可以好....好灑脫架！


8妹子說：
>> 男人葬花，可以好....好灑脫架！
對對對,可以好 man 咁將啲花塞入口,一路一路大叫『好走！』,最後以咀角沾著一片花瓣結束這個畫面。
諗起都覺得掂！


校長說：
no no no, 係男人脫去外衣，露出健碩嘅二頭肌、三角肌、胸肌，用起腱的手臂拿起鐵剷，叼著煙，掘個深兩尺的洞，然後把花瓣一把撒進洞裏，仰著頭，把香煙深吸一口後，凝視洞口三秒，接著把煙屁股用手指彈進穴裏，接著三剷就把穴填了，取回外衣，便頭也不回地回去...
um, 諗落都覺得掂!


哈哈，如此問答，怎能不誌？
.