睇得人會變蠢的職業特攻隊〈鬼影約章〉

.

唉，聽故唔好駁故，我知，咪破壞氣氛嘛，正如買飛睇棟篤笑嘅，一心入場就諗住要笑，結果唔好笑都會笑，只應淺笑嘅都會變成大笑。其實最騎騎笑嘅當然係黃子華、張達明、林海峯之流喇，會諗：哩班人真過癮，俾錢入黎聽我講啲唔係咁好笑嘅嘢，真係好好笑！

哈，言歸正傳，靚佬湯今年哩齣職業特攻隊，整體比上一齣好。更離奇係靚佬比上一齣更 fit 更靚佬，真係要佩服西方美容科技，是不是出咗隻比 Botox 更勁嘅去皺藥呢？真係羨慕死我哩個阿伯！

講真，你唔需要擔心哩齣戲冇動作，相反兩個小時的戲，絕無冷場，有時甚至跳接太快，令你目不暇給。只是戲始終是戲，靚佬湯永遠都咁好運，炸又炸唔死，跌又跌唔到落樓，喺現實世界，有哩啲人就係造化，但都算嘞，睇得人蠢當然唔係哩啲。

係最戲肉嘅俄羅斯嘅導彈打緊去美國，美國竟然毫無反應，啲愛國者呀神盾呀反彈導截擊呀甚至太空激光武器竟然瞓晒覺。按依家水平，任何國家發射導彈襲美，該在一兩分鐘後就被 detect, 跟住就會啟動截擊及反擊，換句話說，俄羅斯一枚導彈襲美，可能會換來十幾枚導彈襲俄。所以就算襲美導彈最後被中止爆破，世界核戰始終不能避免。

哎吔，駁故咁耐實俾人閙喇，當然，乜都咁理性就唔駛有故仔咯！但唔理性嘅實在有好多，美國佬啲黑客技術萬能喇，俄羅斯啲執法同特工特別蠢喇，爬哈利法塔隻神奇手套唔單止有吸力，仲可以反地心吸力，一隻手套可以啜住個重 170幾磅(我估) 嘅靚佬湯唔會 suet 聲滑咗落去，真係神奇恩典！仲有個黑人女角打得好勁，但照計姿色未足以去色誘印度富商掛，除非個印度佬喜歡重口味如咖哩罷！

哎吔，都係唔講喇，得罪人多稱呼人少，但你問我齣戲應唔應該睇，應該！睇場面，睇電影科技，係值得睇嘅！
.
.
.