交通差之二

.

有個星期六，揸部車去中環郵政總局接個女人。上落客區停滿晒車，無位，硬住頭皮要兜喇，但要兜個圈大到無倫，出番干諾道中，上紅棉道天橋，落番皇后大道中，畢打街，入番康樂廣場道，哇，你話唔煩就假。

兜咗兩個圈，個人都吽吽地咯。第三個圈終於見到個女人喇，都係無位噃，咪駛入少少，諗住個轆責住條雙黃線，個女人上咗車就走人喇。蓬一聲車門閂咗喇，我昅一昅睹後鏡，咪鬆 brake扭軚走人咯。就喺哩個時候，我喺睹後鏡見到隻鐵馬啱啱轉入康樂廣場道，距離我架車五六十米左右。

當時諗，其實個轆有冇責住條雙黃線我都唔知個喎，不過唔理喇，都走人咯。慢車去到康樂廣場道干諾道中燈位，紅燈咪停車咯，排頭位。哩個時候架鐵馬駛到喇。

佢停咗喺我右手邊，示意我按低車窗，我先至知道係個差婆。

我問咩嘢事呀 Madam？佢話先生，剛才你喺雙黃線外停車上落客喎。我話唔係呀 Madam, 我駛咗入去個喎。唔係個轆入咗就得嘅咩？

佢話見到個轆無入噃。我話唔係呀，我揸車咁耐唔知個轆有無入？而且我喺睹後鏡見到你啱啱轉入嚟，幾十米遠，你睇得咁清楚，唔係呀？

佢一時語塞，無聲出噃。我細意睇吓佢個樣，姿色麻麻，我心諗，靚啲就話同你嗲多兩句啫，而且個女人又坐喺身邊。哩個時候轉黄燈喇，我問 madam 咁我依家點呀，開唔開得車呀(後邊成排車)？

哈，你估佢點答我？我聽到都打個突 .........

佢話，好，你以後唔好喺中環灣仔比我見到你！

吓，玩威脅牙？警務人員威脅良好市民？我頂呀，不過見後邊成排車，咪費事玩佢咯！

嘿嘿，我喺灣仔住咗、蒲咗幾十年，叫我唔好落灣仔？不過打後都見唔到哩個差婆 lu. 其實我唔想贏架，假如佢靚啲 ！

.
.
.