是德福 MCL 戲院的餐廳。兩年多前戲院重修開幕，餐廳就是我的好去處。我最愛那裏的寬敞，尤其是坐在陽光透入的落地大玻璃窗旁閱讀，我是可以消磨兩三個小時的。
餐廳開幕初期正值金融海嘯，為了吸引顧客是可以免費添飲的，而那裏茶啡的水準都很高，下午茶的蜜糖雞翼更是一絕。我基本上每個週末都會去，與那裏的員工熟絡了，他們都知我口味，會隨餐給我送上清茶，在我享受完那可口的咖啡後，那杯清茶就伴我一整個閱讀旅程了。
這確是喫茶的好去處，但不知為甚麼，生意似乎並不太好。這年來我看著它收縮，先是不再提供早餐，接著麵飽部也結束了。食物的水平也下降了點，以前下午茶的西多士是即叫即做的，現在卻是預先做好，用暖櫃放著，已沒了那種熱騰騰的新鮮。這一切，是象徵著生命的下滑與衰微嗎？果然過年前去，餐廳主任告訴我做到正月十四就要結束了。
我聽後真有點悵然若失，好不容易找到我喜愛的食物和地方，還有這一班很能掌握客人需要的員工，但我在這裏悠然自適的享受竟是如此短暫。
今天是農曆年後第一次去，也許就是最後一次了。在冷雨的下午，我走進餐廳，品嚐了我最愛的蜜糖雞翼，和水準很高的即磨咖啡，還有那杯清茶。我如常坐了兩個多小時，享受了心無旁騖的閱讀。
離去前，我跟最相熟的員工聊了兩句。原來是另一間公司接手了，餐廳會重新裝修，現有的員工則全部解散。唉，又是一段緣份的結束，很多東西都要過去了，永遠不會再被尋回。
相關文章：可以消磨 ， 戲為一弄
.
.
去年今日：急景雕年
.
23 則留言:
香港就是充滿了這樣的無奈.
之前在旺魚女人街找到了一間好吃的車仔麵.到最後跟你說的情況一樣.
另一種就是, 好食->出名->雜誌介紹->爆多人->唔好食.
噢，我小時常常去德福，但從不知這個！還有，我也喜歡去比較靜的餐廳，但這些大多逃不過結業的宿命！
Sun：
好食->出名->雜誌介紹->爆多人->唔好食.
唉，這就是一種從高峰跌下來的沉淪！
S：
商業上講，靜就是衰亡。我去 MCL 都會經過同在德福的星巴克，哇，又吵又窄又逼，卻人多到不得了，俾我就不會去了，但卻時常坐滿人，真諷剌。
可能轉做Sasa/卓越才能捱得住
我曾光顧德福另一間餐廳 － 茜廊（希望沒記錯名字），不好吃，但不知道為什麼能在德福十幾年～
對於香港的小舖，真的執下一間，執下一間，好吃多人的，就不斷的加你租，就算不出名的，一樣也加你租，最後只得連鎖店能留低
整個世界經濟趨向壟斷，文化就走向一體化，無奈吧！卻是現實！
很難得搵到一家自己喜歡的餐廳但又要執真係幾無奈。係喇，德福間星巴克咁嘅環境都唔知點解咁多人，啲人直頭喺你頭頂上面啊！
茜廊又貴又唔好吃哩~
環境唔擠迫、食物質素好、員工殷勤體貼，如果再加埋價錢唔貴，真係唔執先奇！
聽到這消息真有點愕然,
那裏地方寬敞,
又有落地玻璃窗相陪,
有時經過都會看上一眼,
不過總没有機會一嘗,
可惜可惜!
有冇叫人幫你影張你坐在落地玻璃窗旁，閱讀、茗茶的悠閒相呀？
卡卡：
做女人生意，女人男人都會買，確係得嘅，但我覺得極有可能係星巴克之類的店，噢，貴到死！
minor：
茜廊真係唔掂，只去過一次。哩個世界好奇怪，有啲好生意嘅可能係僱客嘅迷信，亦有可能係佢地嘅市務計劃掂都唔奇。
佛爺：
係呀，所以曾智偉齣〈我愛 HK〉帶出信息係好正面嘅，但真係冇乜可能嘅痴人說夢，街坊檔，個體户，頂唔住架喇！
大頭哥：
>>啲人直頭喺你頭頂上面啊！
呵呵，我正有這感覺。我次次在扶手電梯上，都好似睇真人飲茶騷咁！
Arma：
那該是缺乏市務策略，定位欠特色之故。講平講菜式多佢唔夠美心，中產優皮又唔夠星巴克，所以頂唔住。
新鮮：
嗰度最正都係下午茶，午晚餐都唔夠美心砌，所以就算硬件贏咗都冇用。
Coffee：
冇呀！我今時今日嘅身世，仲敢影相咩 :(
可惜!
係呀，Eben, 我心都實埋 :(
我覺得呢間野定位有問題,
佢用餐廳定位, 太open, 而食物又唔見特別 -- 意粉一看就知係叮出黎, 香港人唔多arm。
如果佢定位為cafe, 如starbuck之類, 反而仲有得諗下...
茜廊屹立幾十年, 原因只得一個, 就係佢地一早買落鋪位。(印象中, 佢好似係集團經營)
篤篤：
我都認同你講法，是定位模糊，空有好的硬件但沒有市務策略，生意不好卻只想著 cut 服務以節省成本，只會愈做愈縮。這是步向結束的笨方法。
一早買了鋪位，真是立於不敗之地。上環有間賣香的鋪(真係只賣香不賣衣紙)，平時也少見人幫趁，竟然可以屹立不倒，想也該是自己的鋪了！
自置物業，真喺進可攻退可守，我有個叔公自己買落嘅舖，開咗間眼鏡舖幾十年，幾十年都冇裝修過或入新貨，都可以做到佢過身為止，都喺老街坊客。最記得喺地下嘅格仔紙皮石同埋木摺凳。
而家佢嘅仔女都費事做，放出去收租，工都唔駛返。
Eric：
喺香港，有樓已經唔駛愁，更何況有舖。依家啲舖係以千萬千萬計數，又唔駛驚冇人租同租霸，真係掂上掂！
現在想找有陽光又坐得舒服的咖啡店/餐廳實在是太難了...而清靜的地方, 又通常好快就結業...
所以好遺憾！
Carrie 你沒有再寫了嗎？
打算"搬新地方"呢...安頓後定必告知！
哦，好的，當造訪以賀新居 :)
發佈留言