2011年9月25日星期日

爽報?不如叫喪報咯!

個編輯方向喪嘅,裏面執筆嘅人好多(我講好多)都係喪嘅,特別是那個不雅才子,要啲細路睇佢低格不堪的情色小說學中文,結果啲細路只記得 T back 同旁邊啲毛髮,誰說不是喪中之尤!

其實最喪嘅當然係肥佬黎,眼見爛果報銷量日跌,於是人出免費報佢又出,誰不知這是舉石砍腳,大水沖破龍王廟,自家人打自家人,爛果報銷量更跌,喪報又俾人追打成落水狗,睇黎哩份報紙真係要黎幫佢報喪嘅!

老實講,肥佬黎用高稿酬豢養一班文化佬,當中不乏被譽為頂級學者(事實上肚裏有幾多草另計) ,怎麼沒人給他提點一下呢?其他個個唔講,那個以為深曉天人感應嘅老而不李X, 應該懂得啲讖諱之學吖,哩個咁唔老黎(哈哈,唔..老..黎.)嘅名點改得落呢?

要把這份報章變成真正的喪家之報實在容易,各大屋苑應該不抗拒送來爽報,但送來就唔理唔派發,轉頭就攞去回收。各老師街坊上班族照樣喺街頭攞爽報(不妨搭埋免費車趙埋佢個免費早餐),但轉頭就扔入回收箱,或者益吓收集舊報紙嘅公公婆婆。

呵呵,結果話印行 80 萬份,真正有人睇嘅原來得嗰四五十萬甚至更少,啲廣告商見到咁仲會唔 cut budget 咁老襯咩?到時真係唔慌唔係肥佬黎嘅喪報咯!
.
.
後記:今日劉夢熊喺文匯評論話肥佬黎除了想攻陷免費報紙市場,建立傳媒霸權外,仲想以數量龐大的免費報章配合手機程式版面影響黎緊嘅選舉,哩個可以存照。
.
.
.

18 則留言:

熱血宅男 說...

I like AM730 much more~~~~

Ebenezer 說...

我始終覺得,都係果句:有頭髮邊個想做辣里?

肥佬黎係做生意人,我打死都唔信佢唔知鹹濕野只係雞肋,鹹報又唔係新野,根本末試過有人搞鹹報發到達。因此,我由頭到尾,都認為佢只係諗到冇得諗,走投無路而已。

laulong 說...

730 乾淨,施老闆有料有 point, 是不錯的!

Coffee 說...

我由第一天起就無意識地講成「喪報」,三番四次改唔到口,後來索性不改了:P

laulong 說...

係呀,Eben,佢敗勢漸呈,所以鹹勢反擊!但香港今時唔同往日,以前紅綠、超然冇俾人鬧,依家就只能俾人插喇!

畢竟免費報章係唔同收費報章嘅!

laulong 說...

Coffee:

證明人同此心呀,肥佬黎係天才,不過係喪嘅天才,喪嘅天才睥睨天下,最終只會招挫敗之禍!

Coffee 說...

好耐以前,我睇黎生的一個專訪(唔記得係咩了),好記得黎生話有次係阿X鮑魚食晚飯,介紹佢食一萬元一隻的鮑魚,話好靚好抵食,黎生向對方說︰你叫我食一萬元一隻的鮑魚?你知唔知幾多人一個月才搵幾千蚊呀?如果我食咗,我驚我行出街會畀雷劈死!

所以我當時對黎生肅然起敬,當然如今早已蕩然無存了!他辦免費報紙時,為何就沒有了良知!

laulong 說...

上得阿x鮑魚,就算唔食萬元一隻嘅鮑魚,其他嘢都唔慌平咯,像 200 一碟干牛河一啲唔出奇!富人一頓飯,窮人數月糧是絕對有可能的。肥佬黎若是道德嘅就應該走去食大家樂,然後用省下的錢去賬災扶貧辦學贈醫,但印象裏除了爛果有些形象工程外,肥佬黎卻是慈善稀客,同佢要啄死嘅李嘉誠差得遠了!

Armadillo 說...

哈哈,今日喺日月報副刊就睇到林超榮惡搞,話肥佬黎原本真係想用「喪報」呢個名,不過驚人讀錯「報喪」,所以最後叫做「爽報」。早兩日喺電視睇到,原來有大量即日嘅免費報紙,朝早十點鐘已經喺回收場出現架喇!

鹿米館 說...

laulong兄
近日不少學校都禁佢入校,咁你學校有冇禁爽報呢?

佛爺 說...

校長:

其實好些報紙都有鹹野!點解爽報會搞到咁多事?莫非佢「鹹」字當頭?

新鮮人 說...

仲鬧緊佢?
你咁做咪幫佢宣傳囉,
肥佬黎唔怕人鬧,
至怕無人知喳,
你愈鬧咪愈多人留意佢囉,
中招啦。

laulong 說...

Arma:

呵呵,連林超榮哩條0靚仔都係咁諗?證明肥佬黎改名真係改得屎,連同路人都開佢玩笑!




鹿米:

禁了,早禁了!




佛爺:

講「鹹」,爛果報裏面嘅風月版仲鹹喇,問題係爽報係免費報,而免費報喺香港係大人細路哥都攞,咁佢就犯禁喇!若爽報賣一文份,咁又冇事喎!但賣一文份又冇人會買喎,哩個咪肥佬黎班市務人員白痴嘅地方咯!




新鮮:

插,乜唔插?一個殺人犯唔會因為唔怕死而唔駛死,其理一也!

Sun Sun 說...

可能我無廉恥, 又或者我唔係教育界, 我覺得網上免費色情資訊早已到達足不出戶都無遠佛界, 而且出自壹傳媒都大概想像得到路線如何, 我只係唔覺得市場上要多一份咁樣嘅免費報紙.

收費又唔係入膠袋18歲以下唔俾買, 收錢都唔可以晦淫晦道喎, 東方太陽蘋果都一樣鹹, 所以我最不齒東方太陽成日頭版就插蘋果, 自己就一般黑烏鴉....

利益申報, 我係都市日報支持者.

laulong 說...

Sun:

不,你是述說了一個很真實的現象。只是網頁不同於報業,我們難以對網上帶甚麽社會責任與訴求,但對報業,我們就有更高的道德要求。

免費報紙不同於付費報紙,前者習慣了流入任何人之手(包括青少年),後者有清晰的定位,有些報紙有成人版的,學校也不准學生帶回校,也不主張他們看,而這就是最大的分別。

laulong 說...

再補一句:即使是色情網站,也會登載一句未滿18歲請勿進入,辜勿論有冇效,但爽報連這句也沒有!

SKII 說...

其實我攞過頭兩日,之後已經冇興趣再攞!更冇睇!

laulong 說...

嗯,不要理會這報紙了!