2011年9月18日星期日

滿州里獨白


離開恩和,告別俄羅斯小旅館,原本還有七卡和五卡兩個景點的,但小李說那邊水仍大,車過不了,結果繞路直走滿州里,中間在黑山頭午膳,那只是個普通小鎮,我跟團友說木蘭辭的故事,他們都不大了了!

滿州里,中國的北陲,再過去就是俄羅斯了,所以城裏充滿了異國情調,這裏俄羅斯遊客特別多,店鋪招牌大都中俄雙語,五步一樓的紀念品店儘是賣俄國套娃、望遠鏡、軍用器物,我想,真是俄風壓倒美風了,因為我竟然看不見一間麥當奴!

最終在第五道街,看見一間 KFC,入內看看,兩件雞套餐只賣 23元,算便宜了,但剛才沿路走來才吃了兩串烤羊肉,肚子還是滿滿的,於是只買了一件雞和一杯珍珠奶茶。雞肉很乾身,沒有香港的油膩,托盤上的墊紙寫著用的是白羽雞,說是高蛋白低脂低熱量低膽固醇,但吃起來真沒香港的好吃。

國內的麥當奴或 KFC 都很好坐,光猛,潔淨,空調舒適,厠所乾淨 (洗手盆甚至出暖水) ,對於我這些跑累了的旅人,就是愜意小站了!

( 雞吃了,我一邊叼著飲管一邊寫日記,隣座忽然來了兩個俄羅斯少女,其中一個很不錯啊,呵呵… )

呼倫貝爾之行已近尾聲,明天是行程最後一日。其實真正草原之美,都在海拉爾週邊,所以遊三四天該已足夠。甚麽室韋,莫爾道嘎,都只能說是一種經歷,我那愛看美景靚人的眼睛,在旅遊的末段是未能滿足的。

( 呀,怎麼來了個超胖的俄羅斯女人,把美少女擋著了,噢!)

團友們都去看俄羅斯歌舞,每人要 190 元,只有我這個超齡 LP 堅持不花這些無謂錢。後來聽他們說,人多食物少距離遠亂哄哄,有團友逗留不過 10 分鐘就走人了。嘿,這些綽頭嘢從來不是我杯茶!

( 那幾個俄羅斯女人起身走了,唉,美少女真的不錯,只可惜未能拍下來!)

離開 KFC 已然入黑,這個邊陲小城的霓虹燈很是漂亮,在這裏住的,來這裏玩的,都滿足於投入於這城市無爭無擾的夜晚。我自路邊的流動生果檔,買了幾個桃子,帶回那進房是拉門離房是推門的暫借空間,在白色的燈光下,繼北京後,又來一次滿手汁液淋漓的啃咬。


俄羅斯建築愛大紅大綠,滿州里深受影響。


中國人與俄羅斯人和諧的 mix up.


香港是中英並童,這裏是中俄並重。


小孩抱著待賣的小狗。


人比狗神氣啊!


呵呵,這酒店可不是我住的那間!愛捉挾的你一定想在前面加上一個字!


五道街夜景。


通衢大道上的廣告牌,「緩解性交痛,嫩紅乳暈」,內地夠開放了罷!


香港的三姑見了,一定啋啋連聲了!
.
.
.
去年今日:花後虫
.
.

22 則留言:

Hana 說...

嘩嘩啦!好多字。

laulong 說...

呵呵,我都唔係幾想,但真係寫咗咁多咯!

Ebenezer 說...

雖然多字,但好睇!

你有冇去做spa?舒緩下身體d痛咁呢?

laulong 說...

冇呀,嗰啲俾女人嘅,嫩紅乜乜,騎騎,唔啱我!至於舒緩下身體,我冇處攰,淨係對腳攰咋 XDD

佛爺 說...

校長:

俄羅斯少女?莫非你遇上了托爾斯泰筆下的娜塔莎?戰爭與和平的女主角乎?淳樸而美麗!嘻嘻!

嘩!乜D招牌寫得咁露骨,,子宮陰道清洗都出埋,我都要學一下,唔好太含蓄至得!

這篇也感受到該小鎮的祥和氣氛!

largeheadboy 說...

這裏很不像中國啊!

火女 說...

啊~~~~有生之年我會有機會去看嗎......

自由行 說...

校長:
你應該入內問下有無男仕spa會

新鮮人 說...

嘩~~~~
啲商店招牌宣傳好"直接"呀,
嚇親人,
有點嘔心,
我唔係好接受到,
又話中國人好內歛嘅?
呃人架!!

l.minor 說...

除了有中文字外,真係很不中國~

卡臣 說...

我在大陸見過KFC的老翻餐廳

laulong 說...

噢,佛爺,娜塔莎,好令人遐想的名字,我聯想到一個褐髮碧眼,著小圍裙做家務的美少女呢 !

至於你嘅大作,唔算含蓄喇,睇到我吖 ^^

laulong 說...

大頭哥:

係呀,跟中原城市很不同,畢竟宋以前是塞外了。




女女:

怎會沒機會呢?爸爸咁老都去得咯!




小行:

我行過外面張望過,但入內,真係唔夠膽咯!




新鮮:

喺國內嘅性用品店當街當巷就係,堂堂正正,唔會收埋收埋架,其實中港台三地,香港是最保守的了!

laulong 說...

minor:

所以我都大開眼界呀,就城市看,這裏比海拉爾好很多倍!




卡卡:

有呀,係學 KFC, 我都見過,不過真係提唔起勁入去!

新鮮人 說...

開放和核突只是一線之差,
就算係丹麥都唔會有店子招牌:
"wash your wame, make you feel good"啩?

Armadillo 說...

哈哈,「愛捉挾的你一定想在前面加上一個字」,咁我真係要自動對號入座喇!另,嗰啲廣告字眼又真係幾直接喎,不過太直接就冇晒想像空間,絕對唔係上品,尿碧兒嗰個遮仔廣告就過癮得多嘞!

laulong 說...

新鮮:

哩啲就係文化差異,我諗係滿州里,啲人又習以為常,見怪不怪咯!

laulong 說...

呵呵,Arma,就等你入座咯,其實廣州話真係好鬼傳神,形神態俱備 ^^

尿碧兒嗰個遮仔廣告講乜架?我冇乜睇電視,哩次走寶咯!

Armadillo 說...

你真係好少睇電視喎,個廣告係賣一隻女性敏感部位專用嘅洗滌用品架。哈哈,如果唔係嗰個廣告,都唔知原來有啲咁嘅嘢!

laulong 說...

oh, ic, 原來如此!依家乜都有得洗喇,洗腸,洗腦,股市唔掂就洗埋倉洗埋袋 :(

路漫漫其修遠兮 說...

那些招牌字眼好露骨, 在內地從沒見過, 難道滿洲里特有?

laulong 說...

對呀,在其他城市都未見過,所以覺得很特別。

不過我在北京逛過些成人店,就在王府井大街,教堂對面,人形公仔就在店裏公開擺放,也很開放啊!