2012年2月12日星期日

這幾天只注視林書豪


在此之前,真正在 NBA 打出名堂的華裔球員,其實只有 2.26 米高的姚明,這位有超然高度又不失靈活的球員,能打出身價不足為奇。林書豪卻只有 1.91米,在 NBA 只是僅僅及格的高度,只 200 磅的重量又隨時可以被狂牛般的黑人衝倒,但九天下來卻令球隊打出了個五連勝,瞬間吸引了全球目光。

一切當然事出有因,這位出道初幾次被球會棄用,只能借宿兄長家睡梳化的二線球員,卻在紐約人兩位主力球員傷出後,無人可用時被派上陣,卻能一次又一次的向世人證明他的入球能力,甚至能帶動球隊取得勝利。

這是一個球壇上的灰姑娘故事,林書豪打破了身形與膚色的局限,在他的戰場上闖出了個奇蹟。這故事,令很多有實力但懷材不遇的人滿足了,令很多命途阻滯還在奮鬥爭扎的人釋懷了。對,人生只要來一個機會,低沉的生命就可以高飛,黯黑的路途仍可以璀璨。

一個弱勢奮起的真人示範,我津津樂道。更何況我年輕時也很愛籃球,我享受過很多個汗水揮發的下午黃昏,很多個令人暢快的入球,在眾多 NBA 高大球員包圍下的林書豪,頓然間有了很多個你和我的影子。



.
.
.

18 則留言:

卡臣 說...

華人之光

l.minor 說...

本來我都想寫下佢,不過太多人寫咗lu

原來校長都愛打籃球?哈哈,我都係呀!

上網睇番佢嘅訓練(未係NBA前),都幾恐怖...

佢因為一個機會,又因為佢巳經預備好,造就咗佢呢個灰姑娘嘅故事

希望紐約人果兩位主將返黎之後,唔好覺得風頭被搶,然後放軟黎打,咁就大獲

the inner space 說...

五連勝後,其他NBA的球隊,會有專人分析林書豪,看小動作,看眼神,看形態,去了解每一個球員,供球隊教練,作出針對性部處!

對林書豪的籃球夢,可能是短暫的 awakening,錢途前途並不看好!

Coffee 說...

校長︰

今朝打開報紙二個新聞人物,一個走咗,另一個就跑出。

跑出呢個好嘢呀!

Ebenezer 說...

好一個可以鼓勵年青人的故事。

L L 說...

卡卡:

冇乜優厚條件卻跑出黎,特別令人尊敬!




minor:

後生仔仲要經過很多考驗,兩個主將番黎後佢如何定位好緊要,希望佢續發光芒咯!

至於愛打籃球,我已經剩得個睇字喇,我太老喇,你就仲砌得。




inner:

做唔做到名將,就要睇佢嘅適應力,正如佐敦、高比一樣會俾人針對性睇路,但兩位都能夠成為籃球之神,我反而覺得體力係佢輸蝕嘅!




Coffee:

走咗嗰個係边個呀?跑出哩個梗係好嘢!




Eben:

唱一曲:斜陽裏氣魄更壯 ....

Coffee 說...

下!哦,雲妮。

L L 說...

哦,好多喺藝壇上成功嘅人都係過唔到自己,太豐裕了就變得放縱,最終招敗!

Armadillo 說...

其實佢只係啱啱開始,咁快下定論又好似早咗啲!不過咁網上已經掀起佢係華裔定台裔之爭(好多人覺得係兩樣唔同嘅嘢),真係令到人唔多舒服囉!

l.minor 說...

哈哈...老?我唔覺你係喎,大把人年記大過你都重打緊...XD

佐敦、高比有嘅係天賦、黑人嘅力量、速度、反應,重有努力嘅練習,而且佢地兩個有一打三甚至一打五嘅能力(記得當年活塞隊就係用非常粗野嘅打法對付佐敦,每一下都係hard foul佢),而林書豪本身無黑人嘅力量,就要用更多技巧及變化去打贏其他球員(呢幾場睇數據真係頂級後衛數據,但睇番佢打湖人一場,技巧上可能太單調,變化唔夠),所以佢條路都幾長...

不過我真係好欣賞佢可以為華人(後衛)打出名堂,除咗姚明係中鋒層面外,暫時都無其他人可以突破到佢嘅成就

the inner space 說...

”體力係佢輸蝕嘅!“ 呢點我好同意也是我最擔心,林書豪可以捱得幾多次粗野攔截 。。。。AM730 有篇特寫:http://www.am730.com.hk/article.php?article=92163&d=1685

L L 說...

Arma:

變了白天鵝就爭住黎認親認戚,真係好鬼無聊。




minor:

哇,年紀大過我仲打?但隔幾年就在球場上報銷一件,真係咪搞阿伯!

至於林書豪仍年青,仍有可塑性,希望佢可以不斷突破同蛻變,打出條比姚明更成功和耐久的路。





inner:

>>謙卑,是筆者最欣賞他的地方...

謙卑就可以繼續進步,那篇特寫很好啊,多謝介紹 :)

S 說...

這証明,機會是留給有準備的人;只是,有準備的人又是否一定在對的時空遇上對的機會?

韻味熊貓 說...

校長:

我沒有留意運動,所以也忽略了你這篇帖子!原來是從運動中,悟出人生哲理,十分有鼓勵性!

eric 說...

希望佢有如Steve Nash的成就!

嘿嘿 說...

天生我材必有用!呵呵~

匿名 說...

突然醒起有位 NBA 名控衛

http://en.wikipedia.org/wiki/John_Stockton

John Stockton 退休前效力 猶他爵士隊,
不知是N年前的打法,林書豪可否拿作參考!



sPace

L L 說...

S:

未必咯,命運與際遇,千里馬不遇伯樂,只能平凡老死於槽櫪間!




佛爺:

我有可能是自況呀,我相信我是個一流的清道夫 XDDD




Eric:

Steve Nash, 偉大的控球後衛,希望林書豪也能如此!




嘿嘿:

更緊要係千金散盡,還復來,而且仲要更多 XDDD




inner:

哩個我有印象呀,個子不高但控傳出色,掂呀!