2010年9月15日星期三

EMBA 論壇上的蠢驢

.
哇,中大 EMBA 噃,搞咗個 Forum, 請各行各業有頭有臉的人士做 Talk. 今日明報介紹嘅講者係安立國際顧問(中國) 管理合伙人李子揚先生。

巴閉嗎?梗巴閉,上得 EMBA Forum, 梗係唔簡單喇,淨係坐喺度聽嗰的 EMBA 學生個個都十幾廿皮個月,邊有一個係白丁?

但李子揚先生講嘅嘢笑死人,係部分笑死人。他說「中國人的教育以內容為主,內地、香港、台灣和新加坡都如是。老師會說,你把內容背了就是,課本肯定是對的。」

李先生喺內地、香港、台灣和新加坡都受過教育?聽晒講緊可能係幾百萬教師嘅課?還是做了個大型問卷調查?還是佢有幾十萬個仔女喺四地上晒幾百萬教師嘅課,跟住同佢哩個阿爸滙報老師真係咁講?

唔科學呀,李合伙人。我真懷疑你有冇受過基本的思考訓練?明報幫你加的標題更可笑:「教育放棄背誦,製造業才能增值」。

背誦令裝造業不能增值,理據何在?關連何在?中國發明渾天儀、地動儀、火藥、紙張、印刷術的時候,中國讀書人背得仲勁!

中國人社會製造業不能增值 (假如是真的話) 是有其他原因的,要我為你上一課嗎?

蠢驢戴上桂冠,終究蠢驢,最令人慨嘆是又有人去聽,有人聽後鼓掌,又有低 B 的報紙恭恭敬敬地去登載!

點解哩個世界愈來愈蠢嘅呢 hea?
.
.
.
去年今日:一夜風雨,蓮還在否
.

22 則留言:

Hana 說...

>背誦令裝造業不能增值,

???!!!

我是背唐詩宋詞、四書五經長大的!

Ebenezer 說...

佢係李天命以前教嘅中大地頭癈噏,搵棺材唔知訂??

laulong 說...

花花:

好明顯係阿李生讀壞書,食濕米,唔經大腦,人云亦云。

佢嘅思路同嗰啲廢柴教育高官一樣,認為背誦扼殺思維。

其實背誦係有利思維,邊有人會因為背誦框死思維吖?噏得就噏,跟住啲人就當秘笈,咪死咯!




Eben:

可能真係將軍一去,大樹飄零!依家中大哲學系啲講師唔大得我幾多,可能真係未夠火侯,個思辯氛圍出唔到黎,學問素質要求便平庸了。

至於 EMBA 請講者又重商界地位多過真料。結果好運喺某行業有啲頭臉嘅就可以去亂噏,唉,可悲。

Quality Alchemist 說...

他犯了不相干的謬誤.
但中大的 講師, 水平是很高的.
我上了其中兩個免費講座如下:

http://qualityalchemist.blogspot.com/2010/08/ultimate-9-ways-to-increase-supply.html

http://qualityalchemist.blogspot.com/2010/07/five-pitfalls-of-key-performance.html

篤篤篤撐 說...

學語文, 一定要背誦, 否則冇法識中國文化。

中大思辯氣氛轉淡, 更大的原因是當年梁鋪松開始, 削減文史哲資源, 冇資源自然萎縮

Armadillo 說...

教育以內容為主有乜問題?背書又有乜問題?冇堅實嘅基礎先係問題!

瞎子 說...

技能、技巧、技術,都是靠不斷重覆去掌握當中的奧妙。

講開中大EMBA,好記得之前請過范鴻齡去廢up (
http://thehongkongblind.blogspot.com/2008/10/emba.html),跟住中信泰富就出事。睇嚟中大EMBA真係幾「勁」。

eric 說...

有什麼方式的教育不是以內容為主?真古怪嘅論調!
我好想知道唔喺以內容為主嘅教育喺點樣嘅。無字天書?冥想?求其亂咁教?
冇基礎何來創新?

佛爺 說...

有即是無,無即是有!李高人可能在EMBA講了佛理,內容與EMBA無關!阿彌陀佛!嘻嘻!

巴黎旅客 Voyageuse de Paris 說...

世間太多 人云亦云...
荒謬論日日上演。

laulong 說...

QA:

有去瀏覧過。中大叻人當然有,只是請外界嘉賓,往往只能因為其在業界的地方,但那人的業界地位可能因父蔭而來,或者因符碌而來,結果喺度廢噏,坐喺下面聽嘅其實好無奈!




篤篤:

唉,梁錦松的戇居嘢,叫人頓足(佢都有自知之明,叫自己屋企為戇居)。用商界思維搞教育,教育即死。任命佢嘅老董冇人文思維,正係敗因!




Armadillo:

冇堅實嘅基礎先係問題 … 對呀,背書是深化同鞏固知識,但深化同鞏固不等於我的思想就被框框了。




瞎子兄:

范家那兩兄妹,個妹妹就把教育弄得人唔似人。個大佬就攪到中信泰富搞一鑊粥。據說他們是名門之後,但庸人能夠上位就靠這些?

laulong 說...

Eric:

可能李高人講嘢都不以內容為主咯,只有聲音: er....or....ar....

哇,佢真的超,我諗佢以前學生物化學都不以內容為主架!




佛爺:

好一個有即是無,我再接上個色即是空,整多個男即是女,仲有個堅即是流...

哈哈,哩條友真係好~~~~~流!




巴黎:

太多人就係向聲背實!李先生行業裏翹楚呀,卻原來一堆偽學問!

肥貓 說...

laulong,

不如你開course啦, 我第一個報名.

laulong 說...

貓姐:

慚愧,我可以像一個放大鏡,照出一些欺世盜名者的荒唐,但我有排未到成一家言的資格呀!

你黎睇我發牢騷,我已經好高興咯:p

小丁 siuding 說...

說背誦沒有的人他都不是第一個了, 如果他有前因後果地講, 在某些情況下, 是對的也說不定. 要做到真正活學活用是很難的.

不過我做過不少EMBA的廣告, 講真d 人為左張沙紙同埋去同d 有錢權貴去打交道而去讀, 其實在台上講乜佢地都係照拍掌架啦. 佢地比錢當參加 社交活動之麻 :P

laulong 說...

小丁:

>>d 人為左張沙紙同埋去同d 有錢權貴去打交道而去讀, 其實在台上講乜佢地都係照拍掌架啦. 佢地比錢當參加社交活動之麻...

哩句就係真理喇,難怪中大 MBA, 甚至整間大學排名俾科大趕過頭喇,我都與有辱焉!!

小丁 siuding 說...

其實我質疑那些排名係點得黎的,
話中大有樣衰的 emba, 科大咪一樣有,d 人有左錢就去買學歷, 呢個帶頭的當然係由某些名牌學府頒學位比 李xx 同 何xx 開始.
而且不講話香港係咁, 應該全世界也有這個趨勢了吧...唉

我小學時讀武俠小說時, 看到一句「仗義多是屠狗輩, 負心唯是讀書人」那時我不明白, 拿著句字問老師, 問完之後我想, 我讀好書之後會不會變成「負心人」呢 XD hahahaa

laulong 說...

小丁:

科大會好啲掛?起碼負面嘢少啲喎!

「仗義多是屠狗輩, 負心唯是讀書人」不錯晒,但有一定水份。史上有很多臨大節而不屈的讀書人也很多!

小丁 siuding 說...

科大會好啲掛?<===真係唔知,
我看了佢地請周秀娜做「成功之道」講座之後, 對佢地學校既感覺打折, 問題不在周秀娜, 而是為甚麼她是講「成功之道」, 以及當她唔識答問題, 講師為甚麼事後要向她旳經理人道歉... 感覺得荒謬啊.

不過可能其實我知道相關大學在做的其他野不多, 以此對科大有這個評價實不公平.

所以都只能說是個人感想

以我經手的廣告當中各大院校也有, 每每一個 MBA, EMBA 全部都吹自己可以點點結交權貴, 而非講學問, 我覺得些課程和學習相去甚遠, 高等教育輪落至此, 實在心感遺憾.

也可能是其他講學問的學科根本沒有錢賣廣告吧.

laulong 說...

小丁:

真的多謝你,你讓我想得更多。聽到的不如看到的,這世界,虛象與假象實在太多。

請周秀娜該是科大較基礎的學習活動,類似中大通識講座之類。

到了MBA 課程,該高檔一點罷,倒是很多所謂商界翹楚,思維質素非高,卻據業界位置而度噏一餐。正如文化界,赫赫有名卻原來才具一般,也大不乏人!

Madamoiselle Petite*婉兒 說...

也許這位先生小時候最愛打天才波,不知道背誦為何五吧!哈哈,我小時候也愛天才波(尤其是常識科),上中學後文科逐年不堪,才明白學習不經腦袋記住不算數.

他的意思是不是要說大家只顧背誦,不經大腦思考,所以不好呢?正在念高中的我也很難理解怎麼可以不背書就去考試!

laulong 說...

婉兒:

古時童蒙背書,是不求解的。那是趁年輕記性好,多背,到長大後再融會貫通,古中國的幾大發明,正好證明了背誦不礙創意。

用現在教育理論,有了知識才可以思考,繼而成為智慧。知識的牢固必須靠反覆記憶與運用,不去背去記,何來牢固?

可見這位先生說了個很荒謬的論調。