2011年9月22日星期四

ho ho,又一滴血

網上照片

記得 2001年某日,喺學校切生果,一不留神,竟然把左手食指頭割了一嘢,嘩,深到吖,啲血巴巴聲流出黎。我即刻用力直壓,一直以來我啲血小板都好勁,傷口極易埋口,但那次真係標咗好耐,我都有啲慌,死喇,駛唔駛叫白車呢?

在廁所裏見啲血係咁流入洗手盤去水口,都咪話唔神傷,幸好血最終還是止了,我的神奇血小板還是 function 得不錯的。結果冇同事知我大出血,沒上白車,冇睇醫生,後來食指頭也沒有留下任何傷痕。

但那年打後,就遇上我人生最大的投資挫敗,情況惡劣到差唔多反晒艇!

打後就對投資滿有戒心,尤其股市,間中心癮來時揼少少玩吓,但結果都是輸多贏少。

剛過了的星期天在家裏,用界刀削鞋跟的墊膠,我已萬二分小心了,好了完了,但再看看,還是不滿意,再批多兩嘢,結果就出事了。一錯手,界刀就批到左手食指與手心交接處,割了一個傷口,血又標出來了,不過今次傷口細,很快就止血了!

這個星期股市大冧市,血指徵兆似乎又靈驗了!我又不夠儆醒,迷信得幾倍 PE 的股唔會大冧掛?結果還是俾人質得失魂,雖然我是細細注,輸贏還及不上一場麻雀,但睇佢係咁撻落黎,真係心都實埋。至於後市點樣真係難講,你話好似沙士咁漫長嘅低潮同深度都幾大鑊!

兆應,邪門,真係唔到你唔信!
.
.
.
去年今日:中秋做乜好呢?
.
.

19 則留言:

naruto 說...

雖然我仲有貨,亦撻左落嚟,但我無反應喎,豁達左好多呀

L L 說...

嗯,咁就啱喇,敢贏也敢輸,哩個世界,沒有永遠的上升也沒有永遠的下跌!

l.minor 說...

哈哈~下次要早响,今次我入哂肉呀!好彩重笑我出~

卡臣 說...

血光之災,小心啊

雪山飛狐 說...

看PE没意思. 因为有两个情况PE可以升,一当然是股价升,二就是盈利(Earnings)跌. 你绝得现在那个情况比较有可能发生?

现在不是不能买,但买了要有拿着五年以上的忍耐力.

未来金融界风高浪急,保重.

largeheadboy 說...

我係鴕鳥,我冇理冇開我個 portfolio 嚟睇~

自由行 說...

校長:

早d講麻!中曬呀,不過仍然食得訓得!

韻味熊貓 說...

校長:

一滴精等於十滴血!你一滴血就等於恆指九百點!嘻嘻!

Ebenezer 說...

PE低所以抵買,呢個財演技倆我最痛恨!

犯錯不重要,重要在乎知道自己錯在那裡,然後立即改過。

索羅斯分享過點解佢咁富有:

I'm only rich because I know when I'm wrong.

新鮮人 說...

無貨係手,
心定好多。

L L 說...

minor:

haha, 我自己都唔信邪,所以就瀨咗嘢咯!




卡卡:

喺股市到中咗棍,應該化咗劫喇!




Desert:

大跌市就像保險條款所寫的非抗力,真係 PE 幾低都頂唔住!

我諗住長揸架喇,反正係雞仔注!




大頭哥:

唔睇都好嘅,眼不見心裏就冇壓力,只要唔係有限期嘅股證,就可以話之佢!

L L 說...

小行:

最緊要食得瞓得,今日之跌係部署明日之升,只要唔係等開飯,就冇問題。




佛爺:
一滴精等於十滴血?冇咁勁掛?咁我咪朝朝朝暮暮咪搞到貧血 XDDDD




Eben:

索羅斯係索羅斯,所以股市裏賺到錢嘅人唔多。其實最強最有用嘅心理素質就係識止賺與止蝕,哩個我都係弱雞!




新鮮:

你就係最幸福嘅人喇 :)

Armadillo 說...

哎呀,你冇買跌,咁咪走寶囉?我就黑仔啦,冧市都未算,仲要跌得勁過大市先慘!

瞎子 說...

劉兄小心保重。

上次為銀行爆煲,今次係國家爆煲加銀行爆煲。法國三間銀行已經無同行敢與之做生意。

春來暑往,秋收冬藏。冬天已至。

L L 說...

Arma:

冇呀,冇咁心水清。我已經撳住唔買輪,知個市 chok 上 chok 落,買牛買熊都死。就買件低 PE 嘅實貨,點知都揩嘢!




瞎子兄:

謝謝關心!我雞仔注叫做過吓日晨,唔傷身。不過身在其中,都叫做見證同參與咗個大時代。

匿名 說...

又一滴淚。。。。

抱抱,錫番,无事!

L L 說...

嗯嗯 ....

eric 說...

我都冇眼睇喇乜都跌,早知將啲錢擺喺床下底嗰鞋盒啦。

L L 說...

Eric:

唔駛喪氣,個市遲早升番,因為有波幅啲炒家至有肉食。而且世界經濟大勢長遠向上,依家睇番87年嗰一跌,原來自大蕭條以來的上升軌以來,只是個很小的調整!