何俊仁議事堂上睇艷照

.

蘋果網站消息：

財政司司長曾俊華今日到立法會宣讀新年度財政預算案，這項關乎全港市民福祉、涉及四千多億公帑運用的重大議題，民主黨立法會議員何俊仁卻無心聆聽，被記者發現開會期間埋首透過 iPad 瀏覽多幅索女性感照片，似乎關心靚女「事業線」更甚於港人未來。

何俊仁會後承認「自己會議上分咗心」，並指自己不應於開會時做與立法會無關事務，予人不認真感覺，「我係非常抱歉，大家都知我好少咁樣，可能因為近排有啲太累，做咗啲唔應該做嘅嘢，我就呢樣係要致歉。」他承諾以後會避免出現同樣情況。

何俊仁因貌似一位日本色情電影男角，因而被網民戲稱「AV仁」，被問到性感照片是否「鹹相」，這位「AV仁」說：「我諗好多你地都睇到，都係少女啲相，喺啲網站嘅album度嚟，咁好多我相信可能係一啲模特兒嘅相，唔係一啲色情嘅相。」

何俊仁形容事件令自己「非常尷尬」，又指今次事件「好不幸」，「我係有誠意致歉，就算幾累都應集中精神睇返同議會有關的嘢」。問到平日有否觀看類似相片，何俊仁就指，「乜嘢都會有睇，我唔會話完全無睇，不過今日呢個場合就唔應該咁睇」。

立法會主席曾鈺成則笑著拒評事件，民建聯主席譚耀宗聞言後則「陰陰嘴笑」；民建聯葉國謙被問到會否觀看類似相片時，則說「平日有無望過下就肯定會有，但肯定唔會喺立法會會議上睇」。

*
*
*
*
*

真係眼火爆，連津貼成廿幾皮一個月，竟然大庭廣眾喺議事堂上睇艷照，垃圾真係捨你其誰？

係，條廢柴財爺啲嘢係悶係三幅被，但你曾經貴為黨主席，都自重一下吖，一唔係你就好似爛鬼長毛咁，嗌幾聲剷一下胡鬚曾就俾人趕走，名正言順返自己辧公室印印腳，煲煙上網打機甚至做埋炮兵都冇人知喇，真係又要咸又要做碧咸！

你解畫話「可能因為近排有啲太累，做咗啲唔應該做嘅嘢 」，十足強姦犯嘅辯解咁咯！

香港乜都輸俾星加坡，今次終於爬番星加坡頭咯，講議員夠爛，仲唔第一！
.
.
.