文章轉錄:
<不讀古文何來能力>:
左丁山讀中學時,有幸碰上一位老師,不按照教育司署之課程範圍教國文,直情叫我地到奶路臣街買本「古文評註」舊書,就教我地「弔古戰場文」、「過秦論」、「鄭伯克段于鄢」、「蘭亭序」、「李陵答蘇武書」、「赤壁賦」等等,背書背到我地死死吓,本國文課本反而係咁意講吓就算,記得讀胡適嘅「差不多先生傳」,佢一邊教,一邊鬧胡適,叫我地讀完就可以忘記,唔駛理。依家諗起,佢邊度有教材、學材呢啲嘢架。
親戚Y係教書 Miss,同佢講起依家啲年青人好似唔識古文,在中學究竟學甚麼? Miss Y 沒好氣咁同左丁山講:「你地班人好鬼 out,又唔知我地教緊乜。現在我地全部要依足教育局課程範圍嚟教書,否則冇得做。教育局明令唔准要學生背書,古文唔教好耐嘞。古文只係在中國文學呢一科有,但新學制推行後,上到中四,選修中國文學嘅學生,十個之中冇一個,好多學校根本停辦中國文學科,啲中國文學教科書死晒啦,邊度有學生買呀。至於必修嘅中國語文科,我地要注重學生九種能力,缺一不可,我地冇教材幫手,跳樓都似!」
撞鬼,甚麼九種能力,唔讀「蘭亭序」、「赤壁賦」,識乜嘢中文呀。 Miss Y 話一定要有教科書商教材先至識教,自己編寫就好唔掂,又係乜原因呢? Miss Y 話:「譬如聆聽能力,要有一位發音清、咬字好,無讀錯字嘅人朗誦一篇文章畀學生聽,我地學校冇專業錄音室嘅設備,錄出嚟嘅效果好差,學生聽得唔清楚就會考試肥佬。但書商會做埋專業錄音碟俾我地,你話幾妥當呢。家長買書係幫我地買埋教材(按:過去教材買書附送),但都係用於學生身上,為佢地好啫!」呢啲道理,家長點會明白。怪書商不如怪教育局班課程專家,將教書、讀書搞到咁鬼複雜,令老師疲於奔命,做到得閒死唔得閒病。但自上星期開始,學校唔准收任何教材、學材嘞, Miss Y 如何是好?佢嘆一口氣:「咪叫學校去買囉。學校冇錢買嘅話,學生最受影響,我地邊度有時間去做教材呀,一科通識已經教死人啦!」 Miss Y 又叫左丁山睇吓四月十日「明報」周日一篇「書商食死貓」,呢篇文章最能講出教師心聲喎,四月十六日「蘋果」評論版嘅韓連山亦啱啫!
*******
讀了左丁山此文,感受良多。我讀中文教中文很多年了,對現在所謂的中文新課程徹底失望。把中文閹割到支離破碎,結果是學生對文化精粹了無所知,行文說話卻又不見流暢精煉。這是死局,是一批不夠班的中文人逢迎不學無術的教局頭頭走出來的死局!
.
.
.