2021年9月19日星期日

倏忽樂悠年

政府的所謂德政,出年 60 至 64 都可以兩文搭車,不過要申請樂悠咭。其實我著數唔多,出年都 64 喇,只提前了幾個月享用,唯有同佢鬥長命,識行識企搭車搭到百二歲,咁至不覺得太蝕底。 

樂悠咭可以網上申請,我哩啲仲未算太老嘅,仍未有數碼障礙,要上載身份證同證件相,咪去摷返啲相咯。唉,近照真係不可觀,倒是二十年前嘅那張自己都尚 like,嗰時面上乜膠原都算多,撐得起塊面,而且笑得都算寬顏。再早啲嘅相呢,又唔得喎,唔係面無四兩肉,就係兇巴巴的吱都唔笑。想唔到中年 43 歲哩張反而最令自己接受。

但哩張相放唔到上樂悠申請架,實 reject 喇,呃到自己都呃唔到人,不過可以放上臉書,緬懷一下已經不復再的光影。

.

.

.

.