2021年8月24日星期二

明報的偏信力

哩份報紙我睇咗幾十年,你話我唔識哩份報紙?我諗冇乜邊個夠資格講,毛都未出齊,書讀得唔多,只懂喪吠嘅更不在話下!

公信力?有過一段時間嘅,八十年代至九十年代初罷,但最有公信力?真係廢噏而已。反而我覺得自金庸售報後,這報紙就變得好有立場,甚至係太有立場!

原本有立場,並不出奇,辦報嘅都係人,係人就有主觀諗法,但明報九十年代中後就明顯偏向西方政治與意識文化,上有所好者,下必有甚焉,結果上下皆黃,公信力逐漸喪失,變得明顯偏信。

睇吓班編採,豢養嘅專欄同部分特約寫手就知。盲信民主,逢美英必是,我早兩日踢沈郁龜的廢文,就是出自這報。

前日又黎,貼了個今昔比較,顯示美國搞阿富汗之前之後的社會分別。哇,各方面都有進步喎,不過連鴉片生產量都係呢。乜原因呢?有嘅,條編輯根本唔知罌粟就係鴉片,仲以為係油菜花之類。又或者,佢會話罌粟係塔利班種嘅,但若果係咁,就冇理由放埋在一個美國功德表內架,可見班編採如何白痴!

為美爸舐糞,跟前幾日隻郁龜思維一樣。其實如果阿富汗人民真係因美國而有幸福感,塔利班又點會有成功返桌的機會,民猶水嘛,不是嗎?

製圖個懵種,有冇諗過伊拉克未被老美搞之前,國家如何富足,人民如何熙熙而樂呢?俾美國一袋洗衣粉藉口搞完後,死咗幾多人同社會有幾殘。

再者,來自法新社哩啲數據係咪真,都存疑。報社最鍾意引述咩權威人士,或者咩可靠消息,跟手就好似洗完黑錢咁,消息就真咗。不過,就當料係真,人口,壽命,嬰兒夭折率,就業,阿富汗俾美入侵後哩廿年似大有進步。咁你又唔諗吓新疆,各項成就指標都高喎,點解你又唔公平啲去肯定,讚揚一下中國治疆的成果,反而跟美歐一個鼻子出氣,或明或喑張揚西方對國家的抹黑呢?

不過哩份報紙都有自知之明,已唔夠胆吹噓甚麼公信力了,兼且國安法立後更聞到味,盡管副刊同大部分來論依然黃黚黚,但社論已較為正常,會有返啲 pro 國家的正論。哈,昏瞶了廿幾年,終於有少少醒喇,但已是來得太遲!

.

.


.

.

2021年8月22日星期日

食屎陳師奶今次食埋貓

影星妮歌潔曼免隔離周街走,你真係相信只係憂廢柴同陳兆恥兩個人嘅事? 

成個政府最崇洋嘅非臨阱莫屬,個婆娘以洋為是,一有機會講英文,就 high 九度,就覺得表演機會黎喇,講英文期間飄飄然,覺得自己高人九等,睥睨眾生。其實倫敦街頭個乞兒英文好佢九倍,英文好就係叻人,根本就是個屁信!

今次大明星黎香港,臨阱個婆娘唔 high 有鬼,食屎陳師奶明知老細脾性,點會唔同老細講,唔徵求意見。所以今次厚洋薄己,香港東奧運動員歸港要隔離,個洋婦唔駛,臨阱點可以話唔知卸膊呢,分分鐘最後落槌嘅就係佢。

個婆娘心存大慾,正扭盡六壬跑馬仔,哩壇嘢梗係唔拿上身喇。所以話食屎陳師奶同憂廢柴今次固然要負責,哽埋臨阱隻死貓,自然而然咯!

.

.

2021年8月20日星期五

所謂學者沈旭「輝」的以糞為食

美國倉皇敗走阿富汗,已是昭昭事實。有個以美為是的所謂學者沈郁龜不爽了,最近就貼了篇爛文,一貫的捩橫折曲,話美國背棄阿富汗,並不直接比況台灣。又說阿富汗變天,政局形勢反而不利中國。堆垃圾繼續趴在地上為佢美爸拉下的屎灑香水後深舔。

個所謂學者話,阿富汗政府軍屎啫,但同為美國資助的庫爾德族不死軍勁呀,所以台灣軍隊係屬於後者。條友話因為今日台灣軍隊本土意識漸濃,所以就會像庫爾德族不死軍咁抽得。哈,你話條友係咪 short 架,有本土意識就抽得架嗱,咁全世界九成國家軍隊都抽得喇,仲點分高下呀!台灣軍隊啲蝦碌嘢已經可以編成近代笑史,條友好似了無所覺。

條偽學者又話塔利班掌權,中國就要派重兵守住中阿邊境,以防東突恐怖分子滲透。條友根本唔睇新聞唔知時局。塔利班領導層早前訪華,已宣明不會成為恐怖分子基地,以影響他國,甚至邀請中國重建阿富汗。地理上,中阿接壤只 76 公里,你多派軍隊反而轉唔到身,駛唔駛駐咩重兵呀!

報紙都唔多睇,常識欠奉,一味偏仄,可見哩條友如何浪得虛名,只是個黃媒吹出來的文痞垃圾!

.

.

2021年8月19日星期四

阿富汗解碼

阿富汗戰爭,政府軍節節敗退,美國的所謂軍事情報,認為政府軍可以守住喀布爾三個月,歐美應該有足夠時間徹退。結果沒幾天貨仔就被塔利班進入(不是攻入),美國要倉皇撤退,重演 1975 年的敗走南越,其尷尬處更猶有過之。機場上有阿富汗平民中槍,有人擠不上飛機,攀住起落架,結果半空墜下,有人則在起落架壓成肉塊,真是人間慘事。

最初百思不得其解,阿富汗政府軍怎麽如此窩囊,看多了報紙,才知道貪腐,虛報兵口,尅扣糧餉,皆導致士氣低落,根本就唔想打,結果是不戰而逃。

其實還有一點更真實,到美國聲言喀布爾可以守三個月,潰敗就不會遲到,只會早到。想象一下,假如政府軍也知道最多可守三個月,咁守黎做乜呢?冒住被子彈打爆頭的風險,結果卻是肯定輸梗,軍隊唔田雞過河,各有各撐有鬼!

所以說不怕遇上神一般的對手,最怕有個豬一般的隊友。廿年前美國攻入阿富汗,幾個月就擊敗塔利班,但攻城易,建政難,揼了兩萬億,滅不了塔利班,卻只養肥了貪官,加上策略錯誤,進退失據,只落得個倉皇辭廟,為天下笑!

.

.

2021年8月16日星期一

乜拿物拿,真是個拜屎年代

唔好㷫,要㷫嘅始終係我,一班樣子平凡,卻油頭粉面,了無性格,一出街撞口撞面隨時揾到幾十個的貨式,竟然俾人捧到上天,影像聲音到處轟炸,頂,我都有眼根耳根清淨嘅權利罷,我係咪可以投訴食環署防治虫鼠組,要求搞搞佢!

冇架喇,一個白痴年代,以非為是,以醜為美,當草係寶,缺腦欠智,只顧在崇拜中找尋失落模糊了的自己,知識品味靈魂腐朽闕如,正是世紀末瘋狂敗亡之像!

.

.

2021年8月11日星期三

華叔去後十年,教協湮沒

留下太多疑團。教協敗壞教育,反中亂港,要送入堆填區,事乃必然。但要去到解散嗎?最啟人疑竇的是,解散後那數億資產如何處理?會不會有人在拆骨後,上下其手,中飽私囊?

其實要回到華叔的初心,應該設立信託基金,解散後把資產注入,然後成立一個遠離一切政治意識形態,只關注教師權益的組織。甚至進一步設立獎學金,獎勵傑出學生及支援草根學子,才能貫徹及發揚華叔的精神。

華叔去後,繼任者明顯走錯路,若能重回正軌,才足以慰已逝者之靈。

.

.

我不認同司徒華,但我尊重

華叔又贏一仗

你去後,誰還有那崢崢風骨

心如康莊大道

再無一個司徒華

.

.

2021年8月10日星期二

北街臨阱

頂,跑馬仔臨近,個北街臨阱發咗癲咁博上鏡,係又搶住噏,唔係又搶住噏,又唔知自己樣衰乞人憎,真係睇到嘔心 🤮🤮🤮

一見到唯有轉台,或者靜音,望去第二度,費事影響心情。

小學雞加格賤,由懶清高爛言官到無求品自高,一發覺有機會即刻咀角流涎 hea hea hea 去表演,變咗官到有求 9自 high,依家仲要恬不知恥爭下屆,為咗自己名位富貴就情願禍港多幾年,真係香江哀有臨阱出,欲誤蒼生又五年!

.

.


2021年8月6日星期五

「我地日本隊」?香港開電視你噏乜呀

今日乒乓男團爭銅牌,南韓對日本,竟然聽到香港開電視某旁述說:「我地日本隊」。我頂呀,聽到火都黎,咩「我地日本隊」呀,唔通旁述嘅你係日本籍?

哈日到咁?講緊中文嘅你,應該都係揸中國香港特區身份證嘅中國人罷,你點可以說「我地日本隊」?

你在傳媒講哩句數典忘祖的話,就係強姦民意,傷害緊香港中國人嘅感情,我唔投訴你仲係人!

以後唔駛旨意我睇你個台,手機 app 都即洗,所有有線嘅係咁先,你繼續蝕錢仆直喇你!

.

.

2021年8月5日星期四

「咀」你個頭咩

詛咒係讀成「阻」咒,或者「佐」 咒呀! 

俾你愛回家搞一下,全城又錯多幾成喇!

拍之前問吓人喇,唔該!

.

.

粵音正讀>第40集 咀咒 詛咒 (二)(2011-11-12 00:00:00) (tdm.com.mo)




.

.

2021年8月4日星期三

好煩,若有相同視頻,奧運我都係睇 Viu

無綫啲唔夠專業,搵啲平時不愛運動不識運動的藝員去做主持,講埋啲無謂嘢,正如佢揾兩條儍仔去東京嘻哈度日,開運動員玩笑一樣戇居。

最惡頂嘅係無綫評述員,講嘢滿嘴砂石,語病連連,一句話省去一半都唔會傳唔到意,根本就係揼波鐘,霸佔 airtime。法國選手就法國選手喇,咩「來自法國方面嘅選手」呀,贏得金牌就贏得金牌喇,咩「贏得一面嘅金牌」呀。最毐耳的係 「一有犯錯或者出錯」,我頂呀,犯錯同出錯有乜分別呀!

唉,睇黎患語癌嘅人真係愈來愈多,那個食屎陳師奶又豈只是個獨例。

.

.

語癌陳師奶

2021年8月2日星期一

血 . 緣

因我手心的温度,血,該仍是暖

打死了一隻偷食的蠓,手心的血仍在,但已條件反射的抹走了一些。

裏面,會有另一個人的血嗎?

若有,是甚麽原因你的血會走進我的生命裏,我唔識你嗰噃 😏

.
.
.
.

2021年7月30日星期五

把運動帶入爭議,唔係你錯係邊個

一個已有無數國際賽經驗的運動員,運動衫有國徽或區徽,是對國家或地區的歸屬與尊重,常識黎架喇。奧運都已延遲了一年,你同我講冇時間安排?

經過 2019 年暴亂後,全黑色已成了敏感的政治表態顏色。你同我講唔知道,冇想到?

承第一段,你就係冇 heart 同無能。承第二段,你就係冇腦同冇常識!

所以唔好怪責別人,也唔好話自己係咩悲劇人物。一切,禍由你自招,香港又多了民情分裂同爭議,也是你的無知冇 heart 同無能造成!

至於那些護短,把運動員的事業捧到上天,話咩人生機會因社會批評而消失,只能說無腦白痴。一個沒有專注運動,事業管理能力差勁,甚至有心或無意以運動作政治表態,敗是自招!

所以李慧琼,你咪懵喇,要道歉嘅又點會係穆 sir !

.

.

2021年7月22日星期四

狗官不死, 天下仍賊

 講完 !

.

.

2021年7月21日星期三

從炎明熹,趙爾納看姓名學

兩個好 hot 的名字。一個是年青的歌藝魁首,一個是 DSE 狀元,都是出類拔萃之選。

我沒有研習過姓名學,只在兩個孩子出世後看過一些起名字的書,現在回想,都是唬嚇人亂噏當秘笈之作,絕無足觀。

姓名中的五行相合還是相尅,有可能。我反而著眼在名字是否有意思,是否大氣莊重,是否令人說聽起來都感到舒服。

聲夢傳奇剛完,昨晚與一位研究命理學的朋友談及炎明熹這名字,我用了「有火則明,明成於熹」,去加註這名字。炎為叠火,火旺自然帶來更大的光明,而光明正是由熹微而長成。字義配合得妙絕。此姝的成功,當然因為天賦與努力,但這名字,自己說出與別人道來,都令人舒服,就是優勢。

今日放榜,另一個名字又入眼簾,就是其中一位 8** 狀元趙爾納。他是屯門董玉娣中學高材生。朋友說他極有可能是元朗趙氏,我再搜尋一下,若真是,就乃宋朝皇室之後。當然,隔了千年,血脈已不重要,倒是我覺得這名字一定出自高人之手。

爾為你,己身之外的人。納為包容,接受,不見外,無壁壘。要其他人接納自己,就先要正心純志,顧念他人。做到這樣,就能得到別人的接受與尊重。這是由己而外,再由外而己,納人即納己,名字謙遜莊重,含意深遠,真不可多得!

期望這兩位年青人,繼續努力,為社會帶來更多的愉悅與能量!

.

.

2021年7月18日星期日

陳老哼去咗邊 ?

以前講抗疫,臨阱多係同佢嘅哼哈二將見傳媒,嗰時我已經問將見終去咗邊,唔駛做牙?果然不久,條肥終就被撤職。

今日講打疫苗進度,長者接種特別安排,卻由管公務員嘅聶小哈去講?食衛局嗰件食屎師奶陳老哼呢?去咗邊?咩解究?

係因為大白天了她還在床上肇始緊佢嘅夢?還是好似將見終咁,在落台之前,被架空消失?

係就好呀,大快人心!

.

.

2021年7月17日星期六

死喇,又中

傻夢傳奇,因為屋企人要睇,自己都被收看了。不過去到最後階段,浸淫了四個月,最差的都已經可以見得吓人,聽來也沒甚麽惡感。

要定出最後五強,一個要被 foul,結果呢,就是我曾經貼文批評過說話不知所云的那位。

當然我不是幾個月前已批佢不能入到最後階段,因我從沒收看,不知賽制如何,但就偏偏看到儍夢的宣傳片,撻伐她的說話荒誕。

在這大半年來,我先與施永青抬槓,認為特朗普會敗選,又批評林鄭事先張揚四條立會政棍可過渡,同要求中央寬鬆疫情下的通關要求無理與白痴。結果四條政棍果然被DQ,寬鬆通關要求中央亦睬佢有味。繼後禁年宵花市又俾我諷罵,結果又死死氣復辦。

其他的,像我批評曾志豪識條鐵,張建宗不值 37 萬,真係撞棍,結果一條爛貨一個廢柴都被飛了。

現在我等待的,是食屎陳師奶的下台,鄭虫泰條辱國旗賊絕跡立會,仲有,更重要的是,係林鄭玩完落台,永遠絕跡政界傳媒,唔駛睇來嘔心!

.

.

施永青認為特朗普可連任

死咗就係死咗,點解低 B 的人仲係咁多

北京掌摑林鄭

林鄭成事不足,敗事有餘

鄭松泰不能放

曾志豪識條鐵

食屎陳師奶與無能娥特首

儍夢傳奇

張建宗點值 37 萬

.

.

2021年7月11日星期日

刑偵日記之敗

睇電視係懶人之行,尤其係劇集與綜合節目,你叫我一路睇一路諗餐懵?仲要係 N 咁多可能的精神分裂世界?進入劇情,咪即係要我一齊分裂?儍的嗎?

所以你的低收視,係有原因的。唔睇你嘅,有可能轉咗去睇大叔(當然我唔會,用寶貴嘅時間去睇垃圾?玩咩)。簡單易明的變態,就殺敗你的反轉又反轉,分裂又分裂的諗壞腦世界。

知死未,down to the earth 喇,玩高蹈,等如閂埋門自己玩手指腳趾,自己 high 飽佢!

.

.

2021年7月5日星期一

世上奇人異士真多

隔離檯有個四眼仔,細細粒,一睇就知係非運動人。再眼尾昅多下,樣子介乎天才與白痴之間嗰類。佢同佢老母 (該是罷)食完早餐,一直高談闊論,哇,不得了,量子,光波,數值,有紋有路。佢老母間中答吓嘴,睇落也似係知識份子。

一路食,一路聽,我忽然覺得,自己才是白痴,條0靚仔至係天才,我都係耷低頭食完我嘅早餐快啲走喇 😓

.

.

2021年6月27日星期日

賤種杜魯多

賤換概念的,又豈只夏國賢!卑鄙,由英國到加拿大都是。

加拿大兩處原住民寄宿學校發現近千具遺骸,身為總理的杜魯多樣板表達悲痛,卻從未向原住民道歉。如此駭人聽聞的慘事,一般人都會感到悲哀,所以他的所謂悲痛,並無特別價值,而作為加拿大總理,我們更期待的,是你代表政府來一句真誠的道歉!

沒有,這賤精竟更進一步,學了特朗普的甩鍋,竟然叫教宗方濟各到加拿大向原住民道歉。兩所寄宿學校由教會營運,教廷有責任道歉也不為過,但加拿大政府就可以置身事外?甚至來個華麗變身,由加害者變成了受害者?

慘劇發生在加拿大,歧視原住民,滅絕種族與文化,根本就是加拿大政府與社會的敗壞。慘事發生,教育、懲治、法律機構不予追究,政府又可以置身事外,不用負責?

歷史不容竄改,加拿大原住民的慘痛,白人政府責無旁貸。杜魯多甩鍋,只會令我們對你這個狷狹混帳,厚顏無恥的政客,更添鄙視!

.

.


.

.

無綫新聞,又是是但但

香港仔避風塘大火,無綫新聞片段明顯輸俾 now 新聞九條街。

無綫搞咗新聞報道幾廿年,到今日科技年代,竟然不與時並進。now 雖是後起之輩,也懂得在平地拍攝外,用航拍機以鳥瞰角度去將火災場面多角度呈現。無綫呢,只死估估的在陸上拍攝。

好心喇,航拍機都不懂用,真係 out 幾條街!

不過,now 新聞都有瘀點,除了評論部分偏黃同低智外,就算請嗰啲所謂政論家齋吹,都係無料到睇見就唔開胃之徒,我一見到就轉台,條件反射快到諗到唔駛諗!

.

.

2021年6月26日星期六

賤換概念的夏國賢

英國政客的卑鄙,果然執世界牛耳。衛生大臣夏國賢擺明跟下屬搞情色關係,擁吻到摸臀了,仲好意思話只係違反社交距離指引,為此事道歉,偷換概念,掩飾自己的出軌,唔係賤精垃圾,係乜? 

.

.


.

.

2021年6月24日星期四

哩組 number 實在太邪 !

4 同 14 爭 10 個位,11 同 21爭10 個位, 38 同 48 爭 10 個位。連 21 同特別號碼 31 都係爭 10 個位!

更邪嘅係,今日係 24 號,同攪出黎嘅 14,又爭 10 個位!

死未,信未,你話博彩哩家嘢冇冥冥中安排,揾鬼信!

.

.

.
.


2021年6月23日星期三

抗疫首要在保證恢復內循環

崇洋,還是政府管理層的心態。在明理人看來,這是絕不需要的心魔!

外國月亮特別圓,想不到連病毒,政府高官還是因崇洋而少了戒心。先前以恩主心態放寬機組人員和海員檢疫而爆疫,繼後無視東南亞檢疫鬆弛不嚴格,還堅持熔斷,不去一刀切禁止航港,可見特區政府是如何的落後於形勢。

如今歐盟視香港為低風險白色區域,特區政府崇洋心態又來了,隨即考慮放寬歐洲旅客來港後的檢疫要求。要知道歐洲各地並非像中港澳般極低或 0 確診,只是部分國家像意大利、德國較低確診,英國確診人數更是彈回高位。若放寬歐洲旅客抵港後的檢疫要求,是把香港推到高風險境地,若一有走漏又爆新一波疫情,過去一段時間的抗疫成果,又會成泡影。

歐洲人來港,相對於國內人對香港的經濟利益輸入,港人的團聚,業務,法律需要北上,實在微不足道。中港澳通關才是重中之重。特區政府現在要做的,是搞好抗疫,保證大中華內循環能夠啟動,在歐洲疫情還未完全穩定的時候,根本不用回應歐盟的對等通關要求,維持嚴格抗疫,甚至收緊才是應有之義。

.

.


2021年6月19日星期六

官爛為屎,官廢為賊

守護家門,唔可以去車站守,要守就守村口?奇喇,點解唔去問,唔係該處嘅居民,做乜要黎到該處嘅車站集結,放言挑釁,仲要話拆人祠堂。

話要拆祠堂,若根據上面爛屎嘅邏輯,村民唔好話車站,連村口都唔可以守,要守就要去祠堂門口?即係等如日本要攻陷南京政府,中國人不可到南京地界守護,不可以到機場車站部署迎敵,全部要縮到政府機關門前。你若去機場同車站防禦,就係犯錯犯法!

媽呀,哩啲係乜嘢邏輯乜嘢理據?驗吓腦喇,喺廟堂執令?你做個小學雞都冇資格!

.

.

好簡單的設置, 就係冇人做

沙田大涌橋路的車禍,叫人惻然。那交通黑點,多年來已是多起交通意外,燈號設置卻一直都未見改善。這次慘劇,就是因為司機睇錯燈號,見到示意左轉的孭仔燈變綠,就以為是直去的訊號,結果肇禍。

車禍的發生,固然是因為司機的粗心大意,但交通燈設置容易造成混淆,也是原因。要改善,其實很容易。第一個方案是在交通燈柱加過直去 ⬆️ 的箭咀,讓駕駛者一望瞭然。左轉的燈號不再孭在直去的燈柱,而是獨立種在地上,兩柱中間稍加距離。左轉的燈柱一樣加個方向示意牌 ⬅️,一切就清晰不會混淆了。

若怕司機以為 ⬆️ 表示不用停車可以直去,則可以行第二個方案,加大燈盤,直接在綠燈中藏個直去的箭咀,左轉綠燈也一樣藏個向左的箭咀,就成了。

其實若以第一方案,早有類以的路牌,為甚麼不做呢?

.


.

.


2021年6月16日星期三

唔打針外遊回港要隔離

外地一定會推行疫苗護照,冇打針的港人根本行不得也哥哥。就算有地方俾你唔駛打疫苗去玩 (可能印度 ),但港府有責任控制港人在外地染疫帶回港嘅風險。所以冇打疫苗嘅港人,就算去到旅行,都要回港自費在酒店隔離 14 日,再家居隔離 7日。

嘿嘿,仲唔打針,仆到去打喇 😉

.

.

2021年6月15日星期二

打疫苗冇胆唔免費,就去設優先罷

幾個星期前已提議設免費疫苗注射落閘期,所有 9月底前接種疫苗者可以在打後五年獲免費再種,不接種者就失去這個權利,要打,要到私家醫院或診所自費接種。

睇黎班官都係冇 guts 去做,繼續他們的怕俾人鬧為官避事。哩瓣唔敢,可以轉吓思維啫。搞優先喇,所有9月底前接種者可獲新冠疫苗終身優先接種,若不幸新冠再黎,或者變種病毒忽然肆虐,9月底前唔打針嘅就要等到獲優先接種市民完成後才可以打針。

人點會唔怕死,到時黎殺傷力大的疫患,不曾接種者要捱更長更大的風險,咪怨人!

仲有政府到依家都唔去做訊息廣傳,將來要旅行,就要有完成接種的疫苗護照,唔打針,唔該宅港食自己!貪玩視旅行為人生最大享受的香港人,唔打針,飛唔到,就係自作孽!

九月後不再設大型接種中心,要快打,就自己掏腰包去私院打,唔係就排隊,起碼等你個幾月,死未!

.

.

新冠疫苗五年免費接種計劃


2021年6月13日星期日

叠床架屋的中文

鍵盤肥司長每周發一篇阿媽係女人的網誌,就月收 37 萬,絕對好過借。

今日就自電視新聞聽到他的文章,說香港會為國家未來發展作出貢獻。

聽落去沒甚麽,但有發展不是未來的嗎?根本不須用「未來」去修飾「發展」。寫成「為國家的發展作出貢獻」就可以了。

語言貴乎精煉,今日卻非如此,一味堆砌,徒慕冗贅。無綫新聞報道,九成報道員還是無「嘅」不歡,一百萬嘅人,多宗嘅交通意外,真是教而不善!

.

.

2021年6月12日星期六

李純恩的亂噏過日子

初看這人,還有少少好感,但真係每況愈下,最近翻開報章,除了他的畫可以一顧外,文章已了無可觀。

朋友今天傳來他的文章連結,看了後真的不以為然。這人說三類書不看:教人如何成功的,勵志的,心靈雞湯的。他認為寫這些書的都不見得成功,憑甚麽去指點他人。

他的看法有甚麽謬誤,大家先想一下。

.

.

.

其實這些書是否值得看,很在乎寫的是誰。教人投資的書如果是巴菲特寫的,芒格寫的,李純恩的立論還能成立?

勵志書,那麽三字經,論語,孟子,朱子治家格言該不該看?

心靈雞湯書,我都看過一些,當中不無啟發。行銷幾百萬冊的書,上千萬人看過,就憑李純恩你就說這些書不足觀?

吹得眉飛色舞,他又說電台上幫人解決感情問題的人自身感情生活都一團糟,憑甚麽去指點他人。

好心喇,好歹活了這麽多年,李純恩你不知道電台的這類節目只是噱頭?有人去問的市場,就有人去答的節目,而且這類節目的真正作用,是讓困擾者可以宣洩,有人聆聽,給予安慰或某程度的認同,就是最大的效能。

再者,能醫不自醫還是有的,自己的感情生活一團糟,卻去指點他人,不也是一種過來人的提點?相反有些人命好,感情婚姻生活美滿,或者表面看來美滿,但可能不知真愛深愛為何物,你問他們感情事,求意見,問了也是白問!

李純恩不要再做判官了,因為你沒有足夠的資格,好好的畫你的畫罷,或者講一下美酒佳餚,就是了。

.

.

2021年6月6日星期日

哈哈,無綫新聞終於醒少少喇

有 17 歲少女染變種病毒,其胞姊初步確診,無綫新聞最初在畫面打出信息,措詞用「姐姐」,我已經不以為然,死懵種,真係教而不善!用姐姐形容胞姊是口語,在日常交談特定語境不能說錯,但現在是新聞語言,就要用正規的用語。而且現在常用姐姐去形容家中外傭,根本已成了一詞多義,絕對不宜用要求準確的新聞報道。

還好,過了一會再看,新聞字幕已改了用「姊姊」,即係無綫新聞仲有少少明白人,但要改善的地方仍是太多太多!

.

.

2021年6月5日星期六

商界精英,政府廢柴

商界送樓送盛,主動提供接種疫苗誘因,結果接種人數明顯增加。臨阱條懵種就話提供誘因係商界責任,真係聽到眼都突!商界何來責任,推動疫苗接種只會是政府責任,去打疫苗就是每一個人的公民責任,商界沒有半點責任去掏腰包吸引人打針!

可見哩條所謂學霸,同佢下面個高 IQ 低能鼠目寸光嘅籮局長一馬角色。商界若有社會責任,就是賺了錢要納稅,有良心嘅就做些善業,幫助低下階層市民,而不是扔錢去做政府應做的政務!

其實願意送樓送錢,也可以說是一種商業考慮,因為社會唔自疫患中恢復,營商環境將難以改善,最終也影響盈利。

政府廢柴,接種疫苗搞到一鍋粥,仲喺度翹埋腿話商界有責任?咁即係話佢地唔一早送樓,依家至送,都要負上遲鈍慢九拍責任喇。仲有喎,香港有一百三十幾萬間註冊公司,依家得嗰十幾廿間提供誘因,係咪表示其他百幾萬間公司都不負責任?

送樓送盛嘅公司都唔好開心呀,臨阱話你地係負緊責任咋。不過,作為社會公民,我係感激你地嘅,因為你地補了廢柴政府的底,扭轉了打疫苗的態勢,有功於社會!

.

.

2021年6月4日星期五

東方不敗與東方失敗

講緊嘅東方,梗唔係尋人記嘅東昇哥,又唔係早已清拆多年的東方戲院。係東方錶行?東方酒店?東方小祇園?都唔係,自己對號入座。

對哩份嘢係咁抹黑打針,真係萬二分失望。個姿勢,真係同已死鬼咗嘅癲狗有得揮。

政苦廢柴,要 bann 要丙,自不待言,但抗疫唔靠打針,靠乜呢?唔通靠你每年去廟宇求神問卜,就可以讓香港大步檻過?

咪癲喇,好冇?香港要重新上路,要止疫恢復經濟,要出入境恢復人流,就係要靠打針,別無他法。丙政苦嗎?佢另外的衰處痛處,大把目標,一個月唔瞓覺都未丙完。

睇住你大,睇住你好世界,睇咗你幾十年,從未如此失望過,唔好要我好似扔爛果咁扔咗你。

係東方不敗還是東方失敗,真係存乎一心。

.

.



2021年6月1日星期二

架空肥中,臨阱你真係諗多咗

從未見過作為阿二的正冒私 ,可以如此隱形。你會發覺,臨阱乜都上鏡,連公冒圓打針可以放一日假哩啲雞毛蒜皮小事,都披掛上陣,身旁邊就係哼哈二將,兆恥同耷拳,肥中呢?從來唔見人,唔知係咪俾人支使去咗做 gym 減肥。

擺明係臨阱設計喇,跑馬仔臨近,一方面要爭取出鏡,俾人勤奮凡事親躬的感覺,另外要壓制任何一個可能的對手,但肥中出名無能,文唔得,武又唔得,能夠入閘造成威脅?簡直天方夜譚。

可見哩隻鵝心胸何其狹窄,一個阿頭,可以為咗私利而破壞權責架構,堅拿渣又幼稚。其實佢嘅心懷大欲表示了完全沒自知之明。舞咗幾年,太平山下已是俾你搞到一鑊粥,再俾你搞多五年?仲駛要嘅。冧莊?真係痴心妄想。唔係礙於制度,你抗暴同抗疫都失敗,北大人一早已把你 DQ 咗喇!

冇架喇,俾條白痴做阿頭,根本就係香江之禍。特冇普,肥背奧落台了,不用再看令人嘔心的怪物,我正期待見唔到臨阱,兆恥,虐華,肥中的日子,呵,阿彌陀佛,實現了之後,我捐多啲錢去無國界醫生!

.

.

2021年5月31日星期一

今日的撰稿員遠離水準

雜交水稻之父袁隆平離世,是世界的重大損失。我常想愛恩斯坦如何偉大,科學理論如何高超,對掙扎在飢飽存亡中的貧民,是毫無意義的。只有像袁隆平的糧食科學家,才是他們的教世主活聖人。

偉人離世,無綫電視製作特輯,也是應有之義。只是正式播放前的宣傳片,文稿已概括袁隆平的功績,卻又在末句說究竟袁教授有甚麽貢獻呢?不是令人覺得後語冗贅前言嗎?應該用「了解袁隆平的稻米增產研究之路」,會較恰當。

看了專輯,結語又令人嘀咕。說要把袁教授在稻穗蔭下乘涼的夢想發揚光大。我們只會說把精神、信念、信仰發揚光大。夢想嗎?只宜用實現。

一般人看了這些,沒覺得甚麽,但正是今日中文太任性,只要寫得到,說得出就可以,卻違反了邏輯,相悖了語理,同習慣之弊。

.

.


2021年5月25日星期二

新冠疫苗五年免費接種計劃

言必稱美英的人,為甚麽打疫苗卻不以美英馬首是瞻呢?美國英國疫苗接種率走在世界前列,疫情也明顯緩和。這兩地國民不怕疫苗打死人嗎?當然不是,是他們比香港的很多人明理。

特區政府要令更多人接種疫苗,可定立五年疫苗免費接種計劃。所有在九月三十日前接種新冠疫苗的人,五年內再接種可獲免費。十月開始的五年內,所有公營醫療機構只會為曾接種市民提供免費接種,沒有在九月三十日限期前接種者須自行到私家診所付費接種。

隨著更多國家推行疫苗護照,沒有打針者根本飛不了,香港人沒旅行可去慘過死,不接種就只能宅港。你十月前不接種,打後要種,唔該自己俾錢。

嘿嘿,希望咁樣,能令他們清醒一點罷!

.

.

2021年5月19日星期三

聲夢反傳奇

真係難以理解,擺明係不及水準的演藝初哥小學雞,遠離專業,甚至應有的水平,甩轆,犯錯,失落後的誇張反應。評判都狠批喇,作為觀眾,我又唔係參賽者阿爸,阿媽,朋友,點解我要睇哩啲不堪入目的表演!

有人鍾意睇不入流嘅 show,鍾意睇人失敗,俾人插,鍾意睇人造作,喪喜喪喊,佢地嘅事,我冇咁嘅嗜好同時間,唔好預我!

無綫的節目製作思維真係戇居糜爛,思考下墮到屎忽去了!

.

.

2021年5月17日星期一

無綫新聞,絕不專業

不同場合用不同語言風格,好合理。但無綫新聞徒然令人覺得小學雞,完全混淆應有的語調與詞風。

以色列巴勒斯坦衝突,死亡逾二百人,其中包括不少兒童。無綫新聞用小朋友作稱謂,明顯不當。你現在做的是嚴肅的新聞報道,不是軟性的人文活動形容,用小朋友明顯不適合。

反觀 now 就用對了,用兒童一詞。掌握新聞用詞,明顯高於無綫。坊間有說無綫新聞,是是但但,真的無錯!

.

.

後記:今日無綫新聞唔用小朋友喇,用「細路」🤣🤣🤣

屎即係屎,始終唔肯用最標準嘅新聞語言「兒童」,可見這個是抗拒學習,擁抱錯誤的爛鬼傳媒

.

.


2021年5月14日星期五

與人論股票

>我:我從來不定止損盤,但入市兩年半,賺幅 77%,如何解讀?

網友A:幸運,有福之人。

>我:哈,不盡同意。幸運我梗想有,但用幸運去形容長達 30 個月的買賣?你是用得過度了。我常想,定止損盤固然可以限制虧損在某程度,但卻中了大户的圈套。引你止損,假向下突破然後再抽昇,又有情況是你已是驚弓之鳥,就錯過了打後更低位買回的機會。像紫金,我可以去年最低 2.6 買入,有幾多人做到?我反而覺得是選股很重要,你若能走在一般人及市場之前,能克服恐懼與貪婪,贏面就較大。

網友A:我不反對:但也是幸運。

>我:幸運是必須的。回顧這三十個月,我犯錯也太多,就在錯誤中學習,大家加油!

網友A:你沒錯。我經歷幾次股災生存下來,經歷最深是97金融風暴。過去幾年都無出現過什麼大型股災。所以我説是幸運。

>我:我都唔後生喇,我受過 87 年股災洗禮。贏過,輸過,又絕跡股場過。幾年前再玩,都是輸多贏少,又停了。直至兩多前才再入市,在買賣中練腦,克服恐懼與貪婪,股市可以令你學得很多。

網友B:咁要睇你買乜貨,係咪升得返。 如果升得返,你早啲止損再低位買返,咪可以賺得仲多。 無論如何都係賺少左。

>我:能做到咁就好,但人性騰雞,止損後能夠更低位接回嘅該是少數。人人都叫止損,我看報章上的開倉,星島的股佬該懂得止損罷,搞咗有六七年了,到現在都是 + 1%,晴報郭曉陽不斷提醒要訂止蝕止賺盤,但他的 30 萬倉投資組合,2018 年4月開倉,現今只 +16.4%。中間的道理在那裏呢?

.

.

.
.



2021年5月12日星期三

潮星如屁童

家人問我為甚麽今晚唔睇愛回家,過去我每集都看,而且笑到 ka ka 聲。

今晚唔睇,只因看了開頭,一個染了一頭灰髮的所謂潮星,話連有仇必報眼角奇高的熊尚善都為之入迷。我真係呸呸呸,條友其貌不揚,目無神采,只一個街角屁童而已。就算那些韓星,我都不屑一顧。站在我面前,我只會覺阻碇,咪阻我去路喇唔該!

以貌去謀財,你地嘅事,有人迷你地,唔代表你地優越,我只欣賞有腦有識見樂於行善胸懷坦蕩的人,其他?咪入我眼簾!

.

.

2021年5月11日星期二

犯錯,認慫,跪低

又繼續犯錯,跪低,無限輪迴,這就是我們的特區政府!

有人竟然說林鄭係開埠以來最好的領導,條友唔係 short 咗,未瞓醒,就係食懵咗!認識到如此無知嘅人,真係我一生一大不幸!

.

.

2021年5月4日星期二

2021年5月1日星期六

政府同傳媒成功打造疫苗打死人印象

廢官之錯,前文也有講述。先由六十歲以上長者接種,年紀大了心血管病較多的群體,即使沒有疫苗注射,每天都有數以十計的人病歿或進入 ICU 。政府沒有顧及此點,就妄然從這群體開始,是不懂博奕。在開展注射前沒做好資訊教育,讓市民知道先後關係不等如因果關係,是思慮不周。

傳媒也要負上責任,不要說跟政府打對台的方向報,就算是無綫,now 等幾個新聞台,總是煞有介事的報道那些病亡猝死者前幾多天打過疫苗。又怎能不令市民有錯覺,以為是打疫苗而死呢?

其實以前打流感疫苗,也一定有人在注射了之後幾天或十來天,因自身的心血管,或其他疾病而亡。但那時候因沒有傳媒去報道,於是市民毫無疑慮的去接種。今日打新冠疫苗,卻成了另一個把人嚇得躊躇不前的故事。

可見,觀念是黑是白,感覺是好是壞,原來不在乎知識與真理,而在乎是能手還是庸手去操作,是智者還是愚者去播述。因與政府有積怨而刻意扭曲事實的傳媒更不用說了。

但社會,卻因為廢官的思慮不周,傳媒的無意或刻意扭曲炒作,而付出了代價!

.

.